Тылы сайыннарыы бырагыраама иитинэн саҥа бырайыак сүрэхтэннэ

Өбүгэ ыллыгынан. Эбээн норуотун хоһоон уонна ырыа айааччыта Мария Корякина - Уйагынкын Һунадьын айар үлэтин сүрэхтэниитэ. Бу ураты бырайыак саха өрөспүүбүлүкэтин тылы харыстыыр уонна сайыннарар бырагырааматын иитинэн олоххо киирдэ. Ааптар уонна музыка, фольклор түмэлин бииргэ үлэлэһиилэрин түмүгэр ырыа хомуурунньуга уонна икки ойуулук оҥоһуллан таҕыста.

Алена Корякина, Муома улууһун кыраайы үөрэтэр түмэлин дириэктэрэ: "Бэйбит Муомабыт Буор сыһыы бөһүөлэгин олохтооҕо Мария Корякина айар үлэнэн дьарыктаммыта 30 тахса сыл буолла. Бу кини үлэтин түмүгэ буолар. Бу эбээн оҕолоругар да, эбээн да тылын үөрэтээччигэ аналлаах уонна дойдубут араас омуктарыгар аналлаах". 

Мария Гаврильевна эбээн тылын тарҕатааччы. Кини бу соругун ырыа, хоһоон, үһүйээн, номох нөҥүө ыччакка тириэрдэр. Оҕоҕо өйдөнүмтүө буоллун диэн икки номох ойуулук гына оҥоһулунна. Айымньылар эбээннии уонна нууччалыы тылынан саҥардылыннылар. Сүрэхтэниини бэлбит ыалдьыттар олус диэн биһирээтилэр, дириҥ ис хоһооннооҕун ыйдылар.

Афанасий Ноев, СӨ култуура уонна дуохуобунай сайдыы миниистирэ: "Үлэтэ-хамнаһа эрэ буолбакка, саамай сүрүнэ, кэлэр көлүөнэҕэ хаалларар сыаллаах-соруктаах эбээн омугун фольклоругар олохсуйбут ойуулуктар оҥоһуллан таҕыстылар".  

Оттон ырыа хомуурунньугар Мария Корякина 30 тахса айымньыта киирдэ. Манна ырыа тыла, нуоталара бааллар итиэннэ кюар кодунан толорууну истиэххэ сөп.Уйагынкын Һунадьыны бу бэлиэ күнүнэн чугас дьоно, өрспүүбүлүкэ салалтата эҕэрдэлээтэ. Айар үлэтэ сыаналаммытыттан Мария Гаврильевна олус диэн долгуйа үөрдэ.

Мария Корякина Уйагынкын Һунадьын - эбээн норуотун ырыа айааччыта: "Астынным аҕай, наһаа үөрдүм. Өтөрүнэн маннык чиэскэ-бочуокка тиксэ илик киһибин. Ол иһин долгуйуу улахан". 

Сүрэхтэнии кэннэ бырайыак аны тарҕатыыга үлэтэ саҕаланар. Манна музыка уонна фольклор түмэлэ ылсан үлэлиэҕэ.

Мария Корнилова, А.П. Решетникова аатынан Саха сирин норуоттарын музыкатын уонна фольклорун түмэлин дириэктэрэ: "Бырайыак чэрчитинэн биһиги сыл бүтүөр диэри осуолаларына көрдөрүөхпүт. Ону таһынан “Кочующий музей” диэн регион икки ардыларынааҕы улахан бырайыактаахпыт, ол нөҥүө араас регионнарга эмиэ көрдөрүөхпүт. Маны сэргэ куйаар ситиминэн тарҕаныа. “Саха”НКИК сыл бүтүүтэ туттарыахпыт". 

"Өбүгэ ыллыгынан" бырайыак төрүт искусство уонна тылы сайыннарыы саҥалыы тыыннанан тылы тарҕатыыга  холобура.