Оскуола баһаарыгар сыана хайдаҕый?

Муома курдук ыраах улуустан анаан-минээн оскуола дьаарбаҥкатыгар Слепцовтар дьиэ кэргэн оголорун сана үөрэх дьылыгар тэрийээри киин куоракка кэлбиттэр. Сайыҥҥы уоппуска харчыта ууруллан, биир мааны уолларын оскуолаҕа тэрийэ сыдьаллар. Ыал ийэтэ Анастасия Слепцова хата барытын биир сиртэн ыллыбыт диэн үөрэллэр.

Анастасия Слепцова,  Муома улууһун олохтооҕо: "Оскуолаҕа наадалааҕы барытын биир сиртэн атыыластыбыт. Үрүҥ ырбаахытын, бүрүүкэтин, футболкалары ыллыбыт. Уопсайынан барытын атыыластыбыт, сыаната да биир оҕоҕо сөбүгэр".

Бу курдук өрө көтөҕүүлээхтик оскуола дьаарбаҥката үгэскэ кубулуйан, үөрэх малын-салын атыылыыр эргиэмсиктэри барыларын биир сиргэ түмтэ. Манна суруйар уруучукаттан саҕалаан, күһүҥҥү кэтэр таҥаска тиийэ баар. Рюкзак, атах таҥаһын сыаната былырыыҥҥытааҕар соччо халбаҥнаабатах.

Айаал Курилкин, атыыһыт: "Кыргыттарга түүппүлэ 2500 тыһыынча буолар. Көрүҥүттэн көрөн сыана араас. Холобур, кроссовка 3000 буолар, хаачыстыбата үчүгэй".

Бу көрүҥ табаардарга сыана 2000 солкуобайтан саҕаланар буоллаҕына, оскуола таҥаһыгар 1500-тан. Холобур, маҕан булууһа 1500, сараппаан, былааччыйа 2500 солкуобай, колгуокка 700 солкуобай, үрүҥ баанчыктар 400 мөһөөх солкуобайга тэҥнэһэллэр.  Онтон кацелярскай табаардарга сыана оннунан. Ол оннугар үөрэнэр кинигэлэргэ сыана үрдээбит.

Татьяна Ноттосова, атыыһыт: "Школа России” бырагыраама 4 тэтэрээттээх нобуора ортотунан 3000 солкуобай буолар. Оттон ВПР босуобуйата быйыл сыаната үрдээн кэллэ".

Онтон оскуола үктэлин аан маҥнай хардыылыыр оҕолор таҥастара, үөрэнэр малларын сыаната добуччу соҕус. Холобурун ыллахха, атыыга хамаҕатык барар  бастакы кылаас үөрэнээччитин нобуора 1500 солкуобайтан үөһэ, түүппүлэ 2500солкуобай, рюкзак 3000 солкуобайга тэҥнэһэллэр. Маныаха манна ырыынакка курдук,  сыныйан көрдөөтөххө чэпчэки табаары булан ылыахха сөп,  сорох атыыһыттар сыананы түһэрэллэр.