Үөһээ Бүлүү бастыҥ хаһаайыстыбата “Булгунньахтаах” өссө кэҥиир
Биир ньирэйдээх хороҕор муостаахтан саҕалаан, билигин 400 ынах-сүөһүлээх "Булугунньахтаах" хаһаайыстыба номнуо 34 сылын өрө күүрүлээхтик үлэлии олорор. Кыстыгы этэҥҥэ аһардан, билигин ынахтар сайыҥҥы күөх чээлэйгэ көҥүл мэччирэҥҥэ сылдьаллар.
Күн бүгүн тустаах хаһаайыстыбаҕа 152 ынах үрүҥ илгэни биэрэ турар. Сыллааҕы былааны толорорго үлэлэһэн "Булгунньахтаахтар" 400 туонна үүтү туттара олороллор. Билигин от үлэтэ бара турарын хаһаайыстыба салайааччыта Анна Семенова кэпсиир.
Анна Семёнова, хаһаайыстыба салайааччыта: "Мэйик, Маҥаас нэһилиэктэригэр оттотобун уонна Ороһуга бэйэм арендаҕа сирдээхпин. Ол сиртэн 700 рулону ылабын. Эрдэттэн төһө отунан кыстыырбын суоттаан оттуубут. Күһүн идэһэ кэмигэр 85 төбөнү эккэ ыытабын".
Улахан хаһаайыстыба үлэтэ тохтобоокко барарыгар туһуланан билигин манна 8 киһи үлэлии-хамсыы сылдьар. Манна ынаҕы эрэ ииппэккэ түргэнник сайдар керүҥ кыыллары иитэллэр.
"Булгунньахтаах" хаһаайыстыбаҕа биир бас-көс миэстэни сибиинньэ пиэрмэтэ ылар. Манна күн бүгүн 87 төбө баар”, - Анастасия Добрянцева, корреспондент.
Хаһаайка далбар хотуна кэпсииринэн сибиинньэ иитиитинэн дьарыктаныы эмиэ өр сыллаах үлэ түмүгэ. Харчыга кыра кыһалҕалар баар буоллулар да, сибиинньэлэри эт бородууксуйа оҥорон атыылыырга иитэрин Анна Трофимовна иһитиннэрэр. Манна даҕатан эттэххэ, хаһаайыстыбаҕа араас көмөлөр көрүлэллэр, холобур, нэһилиэк өттүттэн улахан өйөбүл - бууһатар оборуудабанньа бэриллибитэ.
Максим Силигиянов, "Үөһээ Бүлүү нэһилиэгэ" МТ баһылыга: "Сибиинньэни буоһатар тэрил ылан биэрбиппит 350 тыһыынча солкуобайга. Хаһаайыстыба үөрүүтэ-көтүүтэ сүрдээх. Тоҕо диэтэр манна буоһатыы кыһалҕата турар этэ. Хаһаайыстыба кэҥээн өссө төрдүс хотонун туттаары тыа хаһаайыстыбатын министиэристибэтин күрэҕэр кытта сылдьар, ону биһиги өйүүбүт ".
Онтон манна даҕатан эттэххэ, билигин өрөспүүбүлүкэ бары хаһаайыстыбаларыгар от үлэтэ үгэннээн турар. 128 тыһыынча гектар иэннээх сиргэ 100 тахса туонна от бэлэмнэннэ. Манна барыта 7000 звенолар, ол эбэтэр 21 000 тыһынча киһи үлэлиир.