Саха сирин олохтоохторо алдьархайга түбэспит нэһилиэктэргэ көмөнү хомуйаллар

Киһи хараастыбакка эрэ көрбөт хартыыната. Суордаах олохтооҕо Мария Васильева уу түһээтин кытта муостатын туурбут. Дьиэ бүүс-бүтүннүү бадарааҥҥа турар. Онон хайаан да акылаат өрө көтөҕүллүөн наада. 3 оҕолоох соҕотох ийэ мантан күһүн, бу маны барытын чөлүгэр түһэрдэҕинэ эрэ кыстыкка киирэр кыахтаах.

Мария Васильева, Суордаах нэһилиэгин олохтооҕо: «Хайдах курдук куурдан киирэрбин билбэппин. Кыстык чугаһаата. Маны оҥотторорго элбэх улахан үлэ наада, элбэх үп-харчы көрүллүөн наада».

Суордаах нэһилиэгэ билигин бары бу курдук кыһалҕалаахтар,   54 ыал олоччу бары ууга барбыта. От ыйыгар икки төгүл Дулҕалаах үрэх хаатыттан тахсан айылҕа алдьатыылаах күүһүттэн олохтоохтор эмсэҕэлээтилэр. Билигин бары дьиэни-уоту куурдуу, чөлүгэр түһэрии кыһалҕатыгар түстүлэр.  Олохтоохтор этэллэринэн халаан дьиэлэри ортолоругар диэри ылбыт,  онон хоромньу улахан.

Дмитрий Лепчиков, СӨ нэһилиэнньэҕэ куттал суох буолуутун хааччыйыы уонна гражданскай оборона миниистирэ: «В зоне подтопления оказалось более 520 дворовых территорий, в том числе более 240 жилых домов, кроме того, в зону подтопления попали порядка 19 социально значимых объектов».

Оттон бу бараары турар 1,5 туонна көмө Суордаахха уонна Дулҕалаахха тиийиэҕэ.   Амарах сүрэхтээх өрөспүүбүлүкэ олохтоохторо ууттан эмсэҕэлээбит нэһилиэктэргэ бу күннэргэ көмө хомуйдулар. Аҕыйах күн иһэр 10 тахса туонна буолла. Итини таһынан харчынан көмөлөстүлэр.

Ольга Прудецкая, Дьааҥы улууһуттан төрүттээхтэр түмсүүлэрин салайааччы: «Өрөспүүбүлүкэ олохтоохторо 3 мөл. харчыны хомуйдулар. Ол харчыннан ыраах сытар нэһилиэктэрбитигэр халааҥҥа эмсэҕэлээбит дьоҥҥо дьиэлэрин-уоттарын куурдарга ититэр сылытар маллары ыла сатаатыбыт».

Гуманитарнай көмөнү тириэрдии бу күннэргэ тэтимнээхтик барыаҕа, ону тэҥэ устудьуоннар тутар этэрээттэриттэн 60 киһи Сайдыы, Дулҕалаах уонна Суордаах нэһилиэктэригэр көмөҕө барыаҕа. 

Көмөнү тириэрдиэхтээх бөртөлүөт Дьааҥыга халлаан туруга мөлтөх буолан көппөтө. Санатан эттэххэ бу нэһилиэктэр улуус кииниттэн 300-500 килэмиэтир тэчиччилэр. Онон салгынынан эрэ сырыы баар.