Лоҥхо Уус: итии тимиргэ уус ис туруга иҥэр

Кыһа оһох кытыастар уотугар саха быһаҕа буолан тахсыахтаах тимир ититиллэр. Ити кэннэ Лоҥхо Уус кыстыгар бэрт сатабыллаахтык, хас охсоотун аайы, хатан тыаһы кытта, быһах моһуона таптайыллар тахсар. Инники салайар үлэҕэ сылдьыбыт Тэтим Лоҥхо билигин дьоҕурун идэ оҥостубут.

Тэтим Буурхат Лоҥхо, тимир ууһа: "Олох үлүһүйэн туран 2018 сылтан. Олох күүскэ. 2018 сылга диэри нэһилиэк баһылыган үлэлээбитим. Ол кэннэ утаппыттыы күүскэ үлэлээн саҕалаабытым". 

Онтон ыла бу дьоҕус уус кыһатыгар  тыһыынчанан быһах, хомус чочуллан таҕыста. Аҥаардас анал байыаннай дьайыыга 400 тахса быһаҕы оҥорбут. Лоҥхо Уус удьуору утумнааччы. Киниэхэ икки өттүттэн улахан тимир уустара бааллар. Бу кыстык аҕатыттан хаалбыт. Онон эппиэтинэс хас да бүк. Быһах тимирин охсууга ортотунан биир чаас барар, бу кэмҥэ уус туох баар сыратын сылбатын ууран туран, үйэлэргэ хаалар оҥоһугу оҥорон таһаарар.  

Тэтим Буурхат Лоҥхо, тимир ууһа: "Тимири охсорго, уопсайынан ханнык баҕарар оҥоһугу оҥорорго, уус бэйэтин ис туруга, өйө-санаата, майгыта-сигилитэ иҥэр диэн ааттыыбын итии тимиргэ. Итии тимир наһаа элбэҕи оборор". 

Дьыаланы саҕалааһыҥҥа социальнай хантараак  тирэх буолбут. Көмө үбүнэн туттар тэрил ылан, уһанарга бары усулуобуйа баар. Ол курдук уус кыһата, кыын, кур оҥорор сир туһунан, ону тэҥэ, аһыыр сынньанар хос. Дьон этэринэн  Лоҥхо Уус быһахтара ураты бөҕө уонна сытыы буолаллар. Ол кистэлэҥэ таптайыытыгар сытарын үллэстэр.

Тэтим Буурхат Лоҥхо, тимир ууһа: "Ититэн таһааран баран аны маннык ыгыаҕым. Манна эмиэ биитин ыктым бу. Физика сокуонунан тэнийэн кэдэрийэн иһэр. Ол кэдэрийиитин мантан көннөрөбүн. Ол көннөрөрбөр биитин эмиэ ыгабын. Оччоҕо биитэ кытаанах буолар". 

Лоҥхо Уус сатабылын уонна дьоҕурун, кини суолун утумнааччыларыгар, 3 төрөппүт уолугар иҥэрэр. Улахан уола Андрей эдэр уус номнуо тимир охсуу курдук уустук дьыалаҕа тэбис тэҥҥэ сылдьыһар. Итини сэргэ ыччат уус саха быһаҕын туттарга өссө табыгастаах буоллун диэн бэйэтэ ситэрэн-хоторон курдары оҥортуур.

 Андрей Пинигин,  уус: "Бастакы курдарбыт боростуойдар этэ. Онтон илии баран, сатаан үөрэнэн, атын оҥоһуктартан хаалсыбаты оҥорор буоллубут". 

Ити курдук аҕалыы уол төрүт дьарыгы сайыннарыыны, дьарыктаах буолууну кытта тэҥҥэ дьүөрэлии туталлар.  Кыһа оһох кытыастар уота,  кыстык хатан тыаһа – тимир уустарын утума салҕанарын  кэрэһэлиир.