Суолу араҥаччылааһыҥҥа бэриниилээх үлэ
Үйэ кэриҥэ суолга куттал суох буолуутун көмүскэлигэр. Үбүлүөйдээх күн иниспиэктэрдэргэ уратытык саҕаланар. Бырааһынньыктааҕы сэлэлии турууттан, бастыҥнары наҕараадалааһынтан. Ону тэҥэ урукку кэминээҕи ГАИ тиэхиньикэлэрин быыстапката туран, тэрээһини киэргэтэр, сүргэни көтөҕөр. Үгүс киһи кэм кэрэһитин хаартыскаҕа түһэн үйэтитэр. Ол кэннэ көлөлөр киин куорат киин уулуссаларынан парадтыы айанныыллар.
Саха сиригэр бу салаа бастакы иниспиэктэртэн саҕалаан сыыппара кэмигэр диэри араас түһүмэҕи ааста. Оччолортон бу күҥҥэ диэри сүрүн сорук уларыйбат - суолга куттал суох буолуутун ситиһии. Национальнай бырайыактар иилэринэн үлэ ыытыллан, суол-иис тупсан, материальнай техническай хааччылыы тупса. Кэнники 7 сылга көрдөрүү биллэ тупсубут.
Владимир Прокопенко, Ис дьыала миниистирэ: «У нас с 2018 по 2025 год на 50% сократилось количество ДТП, на 53% сократилось количество погибших. Это довольно-таки очень большой процент».
Тыйыс тымныылаах, өҥүрүк куйаастаах региоҥҥа суолга бэрээдэги хааччыйыы эмиэ уратылаахтык барар. Маныаха тиэхиньикэнэн хааччыллыы, сыыппара оборуудабанньатын олоххо киллэрии үлэни хайа эмэ судургутутар.
Николай Жирков, СӨ суолга куттал суох буолуутун хааччыйар иниспиэксийэ хонтуруоллуур уонна эксээмэнниир салаатын салайааччытын солбуйааччы: «Өрөспүүбүлүкэтээҕи ГАИ үлэһиттэрэ 600-кэ киһи баар. Кэнники кэмҥэ фото- видеофиксация комплекса туттуллар, элбэх саҥа патрульнай массыыналары ылбыппыт».
Историяҕа хаалар бэлиэ түгэн. Хас да көлүөнэ Госавтоинспекция салалтата биир сыанаҕа. Үбүлүөйдээх күн дьоро тэрээһинэ саҕаламмытынан ааҕыллар. Ил Дархан Айсен Николаев эҕэрдэлиир, иниспиэксийэ үлэтин сыаналыыр. Көрдөрүү сыллата тупсарын, инниктин салалта уонна министиэристибэ бииргэ үлэлэһиитин өссө бөҕөргөтөрүн этэр. Онтон дойду Президенын соругунан 30 сылга диэри суолга киһи өлүүтүн ахсаан 1.5 төгүл аччыахтаах. Маныаха сэрэтии үлэтин оруола улахан.
Владилена Охлопкова, Дьокуускай куорат суол-иис инспиэксийэтин пропагандаҕа салаатын инспиэктэрэ: «Үлэбит күөстүү оргуйа турар. Хас күн ахсын арааһынай профилактика бөҕөтүн оҥоробут. Билигин лааҕырга сылдьар оҕолору кытары араас сэрэтэр үлэни ыытабыт».
ГАИ үлэһиттэрэ билигин суоппардары, сатыы сылдьааччылары кытта доҕордуу сыһыаны олохтуур тутулу тутуһан үлэлииллэр. Ол курдук кинилэр бастакы көмөнү толору оҥорор кыахтаах исписэлиистэр, тыйыс тымныыга хайа баҕар түгэҥҥэ көмөҕө кэлэргэ бэлэмнэр.