Оҕунан ытыы чемпионатыгар бастакы кыайыылар

Дьокуускайга "Туймаада" стадиоҥҥа оҕунан ытыыга Арассыыйа чемпионата ыытылла турар. Күрэхтэһиигэ Дойду бастыҥ охчуттара кыттыыны ылаллар. Саха сиригэр оҕунан ытыы күрэҕэ 12 сыл устата ыытыллыбакка буолан баран, быйыл сайын дьэ сөргүтүлүннэ.

Михаил Филатов, оҕунан ытыыга Саха сирин сүүмэрдэммит хамаандатын сүрүн тренерэ: "Күүстээх ытааччылар  кытта сылдьаллар. Саха сиригэр сайыҥҥы чемпионат бастакытын ыытыллар".

Саха сирин ураты айылҕата ыалдьыттарга да, кыттааччыларга да умнуллубут буолла. 30 кыраадыс итиигэ аһаҕас халлаан анныгар спортсменнар бастыыр иһин киирсэллэр. Күрэхтэһиигэ Арассыыйа үрдүнэн призердаабыт, чемпионнаабыт ытааччылар бааллар.

Семён Лукин, "Ойуур" кулууп чилиэнэ: "Дьахталларга да эр дьон да өттүгэр күүстээх, үрдүк ситиһиилээх кыттааччылар бааллар. Арассыыйаҕа чемпионнаабыттар илин-кэлин түсүһэ сылдьаллар".

Оҕунан ытыы хас биирдии норуокка араас көрүҥнээх. Ол курдук спортсменнар  сахалыы төрүт ньыманан   "Байанай ытыытыгар" боруобаланнылар. Куобах, кус, тииҥ - сүрүн сыал.

Сардаана Эверстова,  Дьокуускай куораттааҕы "Туймаада" спортивнай кулууп  чилиэнэ: "Сахалыы ох мас буолар, оноҕоһо эмиэ мас, уһуга суох. Куобах, кус, тииҥ моһуоннарын ытабыт".

Урут уруккуттан хас биирдии омукка ытыы спордун көрүҥэ ураты. Оттон Өрөспүүбүлүкэҕэ ох тэтимнээхтик сайдар, саха охчуттара үрдүк таһымнаах күрэхтэргэ куруук ситиһэллэр.

Галина Павлова,  Таатта улууһугар ох саанан ытыыга  сүрүн дьарыктааччы: "Холобур, бүрээттэр кегли диэннээхтэр. Урут биһиэхэ 1980 сс. бу көрүҥ үөдүйэ сылдьыбыта. Онон сэбиэскэй дьон кегли ыта сылдьыбыппыт. Сахалыы ох итиннэ маарынныыр, ол эрэн сыалбыт олбох үрдүгэр турар, оттон кегли киэнэ сиргэ".

Оҕунан ытыыга Арассыыйа чемпионата от ыйын 3 күнүгэр диэри буолуоҕа. Бу күннэр устата спортсменнар  бэйэлэрин дьоҕурдарын, кыахтарын көрдөрүөхтэрэ. Өйүүн күрэхтэһии түмүгэ биллэн кыайыылаахтары быһаарыахтара.