Дойду ааттаа-суоллаах худуоһунньуктара Саха сирин суруйаллар

Ил Дархан Айсен Николаев Москва куораттан кэлэ сылдьар Арассыыйатааҕы худуоһунньуктар академияларын  чилиэттэрин кытары көрүстэ. Ыһыах ыһар кэмҥэ Саха сиригэр аар-саарга аатырар 5 худуьуоһунньук кэлэн үлэлээтэ.

Александра Неустроева, П.П.Романов аатын сүгэр Дьокуускайдааҕы художественнай училище салайааччыта: "Саха сирин историятыгар аан маҥнайгытын академиктар кэлэ сылдьаллар. Кинилэр дойдуга биллэр улахан худуоһунньуктар. Дьокуускайдааҕы художественнай училище сүрүн тэрийээччи буолабыт".

Худуоһунньуктар кэлэн Үс Хатыҥ ытык сиригэр ыһыах түһүлгэтин уруһуйдаатылар. Ол курдук арыллыы сиэрин-туомун, күн керсүүтун,  анал түһүлгэҕэ Саха сирин биир сүрүн, күүстээх  алгысчытын Охонооһой мэтириэтин үйэтиттилэр. Бу күн академия вице-президенэ Михаил Шишин өрөспүүбүлүкэ Ил Дарханыгар бэлэҕин уунна. Итиэннэ салгыы бу хайысхаҕа туох үлэ барыаҕын кэпсэттэ.

Михаил Шишин, Россиятааҕы худуоһунньуктар академияларын вице-президенэ, академик, искусствовед: "Биир маҥнайгынан олоххо киириэхтээх Афанасий Осипов 100 сылын бэлиэтээһин. Кини 20 үйэ уонна 21 үйэ саҥатын улууканнаах худуоһунньуга. Кини туһунан киэҥ хабааннаахтык сырдытар үлэ үрдэнэр. Дьокуускайга, Москваҕа эрэ буолбакка кырата Сибиир бөдөҥ куораттарыгар Афанасий Осипов айымньыларын быыстапката туруохтаах".

Академияны кытары үлэ хас да хайысханан ыыттыллыаҕа. Бу уруһуйдар барыта түмүллэн улахан кинигэҕэ кубулуйуохтара. Онон үлэ билиҥҥиттэн саҕаланна.

Афанасий Ноев , СӨ култуура миниистирэ: "Сөбүлэҥ түһэрсиллэн бу үлэ саҕаланна диэн этиэххэ наада. Бу үлэбит хас да кэрчиктэн туруоҕа. Биһиги  кэлэ сылдьар худуоһунньуктары кытта үлэлэһэн Дьокуускай 400 сылын көрсө быыстапкалар туруохтара".

Салгыы Саха сиригэр уруһуйдаммыт хартыыналары Москва, Санкт-Петербург куораттарга быыстапкаҕа туруорар үлэ барыаҕа.