Туймаада ыһыаҕа сүүһүнэн тыһыынча ыалдьыты түмтэ
Туймаада туонатын Үрүҥ тунах ыһыаҕар алгыс түһэр. Саха норуота Үрдүк Айыыларга сүгүрүйэн туран көрдөһөр, алгыстанар, арчыланар.
Бу курдук ыһыахха улахан сиэр-туом оҥоһуллан, алгыстан саҕаланар. Быйыл Туймаада ыһыаҕар хаһааҥҥытааҕар да элбэх киһи сырытта. Манна Саха сирин олохтоохторо, дойду бары регионуттан, Индияттан, Кытайтан уонна да атын тас дойдулартан элбэх киһи ыалдьыттаата.
Евгений Григорьев, Дьокуускай куорат аҕа баһылыга: "Үрүҥ тунах ыһыахпыт үгүс дьону түмэн өбүгэ үгэһинэн баран иһэриттэн киһи астынар, дуоһуйар. Биһиги ыһыахпыт быйылгы Сомоҕолоһуу сылыгар оруобуна сөп түбэһэр. Биһиги ыһыахпыт саха сирин дьонун эрэ буолбакка, модун Россия бары омуктарын түмэр".
Саха төрүт үгэһин, култууратын, ыһыаҕын сылын аайы көрө-истэ, кырдьык да, элбэх ыалдьыт кэлэр. Быйыл Култуура сылыгар ыһыах ураты, баай ис хоһоонноох, киэн бырагыраамалаах буолла. Дьон-сэргэ үөрэр, күн-дьыл да туран биэрдэ.
"Үөрэбит-көтөбүт, хайдах эрэ саҥа тыын ылар курдукпут. Манна кэлэн куруутун ыраастанабыт", -диэн эдэр ыал үллэстэр.
“Саха сиригэр бу курдук сомоҕолоһуу баара буолуо дии санаабатаҕым. Маннык көстүүнү Индияҕа эрэ көрбүтүм. Оттон биһиги дойдубутугар, Саха сиригэр маннык сомоҕолоһууттан олус диэн сөхтүм-махтайдым”, - диэн ыһыах ыалдьыта этэр.
“Норуоттар бу курдук бииргэ сомоҕолоһо сылдьаллара олус үчүгэйдик көстөр”, - диэн аҕыйах ахсааннаах норуоттар бэрэстэбиитэллэрэ бэлиэтиир.
Икки күн устата хас түһүлгэ, былаһаакка аайы тиһигин быспакка бэлиэ тэрээһиннэр, кэнсиэрдэр, күрэхтэр. Уопсайа, 100-тэн тахса тэрээһин буолла.
Ил Дархан Айсен Николаев хас биирдии түһүлгэҕэ сылдьан дьону-сэргэни кытта көрүстэ. Саха омук төрүт идэтин илдьэ сылдьар дьоммутун көрсөн үлэлэрин, ситиһиилэрин кытта билистэ. Бар дьону Туймаада ыһыаҕынан эҕэрдэлээтэ.
Айсен Николаев, СӨ Ил Дархана: "Алгысчыт Үрдүк Айыылартан алгыс ылан дьолу-соргуну, байылыат олоҕу көрдөһөр. Ити тыллар хайаан да туолаллар дии саныыбын. Бүгүҥҥү алгыс барыбытыгар тиийдин. Дьолу-соргуну, кыайыыны-хотууну аҕаллын".
Саха норуотугар ыһыах улахан суолталаах. Үрдүк Айыылартан көрдөһөр, алгыстанар кэмнэрэ буолар. Онон хас биирди саха дьоно ыһыаҕы көтүппэт, күүс-уох ылар, айыыларга сүгүрүйэр.