Дьокуускайдааҕы ГАИ иниспиэктэрдэрэ күүһүрдүллүбүт эрэһиимҥэ көһөн үлэлииллэр

Суһал иһитиннэрии киирэн иниспиэктэрдэр Чернышевскай уулусса хайысхатынан түһүнэн кэбиһэллэр. Киин куоракка нэдиэлэ саҕата, ол эрэн бырааһынньык күүннэрэ бэйэлэрин биллэрэллэр. ГАИ иниспиэктэрдэрэ аҕыйах мүнүүтэнэн куорат кииниттэн, биир түгэххэ баар буола түһэллэр. Онно номнуо 2 патруль массыыната тиийбит.

Нэһиилэ атаҕар уйуттар суоппары массыынаҕа киллэрэллэр. Салгыы оперативнай-бэрэбиэркэлиир үлэ саҕаланар. Бу курдук бэс ыйын 11 күнүттэн Өрөспүүбүлүкэ үрдүнэн суолга-иискэ куттал суох буолуутун хааччыйар иниспиэксийэ күүһүрдүллүбүт эрэһииминэн үлэлиир. Күн аайы икки бүк элбэх түүннэри-күнүстэри дьуһуурустубалар олохтоноллор.

Владилена Охлопкова, Дьокуусукай куорат суол-иис инспиэксийэтин пропагандаҕа салаатын иниспиэктэрэ: «Сүрүн өттүнэн биһиги аһыы утах иһиилээх уруулга олорооһуну көрөөһүн буолар. Ону кытары дьону таһааһыны, оҕолору сөптөөхтүк таһааһыны уонна суол бэлиэлэрин тутуһааһыны».

Чахчы, сайыны баттаһа аартыктарга тимир көлө элбиир. Ону кытары суол быраабылатын кэһии түбэлтэлэрэ. Аҥардас бу сыл саҕаланыаҕыттан 1000-тан тахса араас буруйу оҥоруу түбэлтэлэрэ тахсыбыттар.

Иванна Петрова, Дьокуускайдааҕы суолга куттал суох буолуутун хааччыйар иниспиэксийэ судаарыстыбыннай иниспиэктэрэ: «Бу сыл саҕаланыаҕыттан Дьокуускай куорат үрдүнэн 1400 тахса суол саахала бэлиэтэннэ. Манна 200 тахса киһи эчэйии ылла. Оҕолор кыттыылаах 38 суол саахала бэлиэтэннэ. Ону таһынан хомойуох иһин 3 киһи күн сириттэн туораата».

Анал суол батальонун судаарыстыбаннай иниспиэктэрэ, полиция лейтенана Юрий Ермолаев сайыҥҥы кэмҥэ, чуолаан ыһыахтар кэмнэригэр үлэбит икки бүк элбиир диэн кэпсиир. Онно кинилэргэ улахан төһүү АвтоУраган диэн ааттаах патруль массыынатын иһиттэн кэһиилэри, буруйдары булар оборуудабанньа көмөлөһөр.

Юрий Ермолаев, Дьокуускайдааҕы суолга куттал суох буолуутун хааччыйар инспекция анал батальонун судаарыстыбаннай инспиэктэрэ, полиция лейтенаана: «Оскуорас кэһиитин бэлиэтиир уонна бэйэтэ ыытан иһэр. Архыыпка баар массыына нүөмэрдэрин булар».

АвтоУраганы кытары тэҥҥэ суолга эмиэ күүстээх үлэ барар. Иниспиэктэрдэр хас биирдии суоппары ымпыктаахтык бэрэбиэркэлииллэр.

Светлана Сивцева, суоппар: «Сайыҥҥы кэмҥэ наада. Кутталлаах, массыына элбэх буолар, матассыыкыллар, бэлэһипиэттэр элбэх буолаллар».

Онтон маннык күүһүрдүллүбүт эрэһиимҥэ ГАИ иниспиэктэрдэрэ бэс ыйын 28 күнүгэр диэри үлэлиэхтэрэ.