Бэс ыйын 22 күнүгэр Дойду үрдүнэн Кэриэстэбил уонна кутурҕан күнүн бэлиэтээтибит

Кыайыы болуоссатыгар сүрүн монумеҥҥа сибэкки дьөрбөтүн ууруу тэрээһинигэр Быраабыыталыстыба бэрэссэдээтэлин солбуйааччы Ольга Балабкина, ыччат миниистирэ Петр Шамаев, бэтэрээннэр сэбиэттэриттэн, военкомат бэрэстэбитэллэрэ, юнармеецтар кытыннылар. Дойдубут хас биирдии олохтооҕор Аҕа дойду Улуу сэриитэ ыар сүтүгү, оспот бааһы аҕалбыт алдьархайа үйэлэргэ умнуллубат. 

Пётр Шамаев, СӨ ыччат миниистирэ: «86 фашисткай Германия сэрэппэккэ Сэбиэскэй Сойууска саба түспүтэ. Ол түмүгүн билэбит бары, төһөлөөх элбэх дьон суох буолан биһиги Кыайыыбытын ситиспиппитин. Ону эдэр ыччаттарга, оскуола оҕолоругар тиэрдээри бу тэрээһини оҥоробут».

Дьокуускайдааҕы 29 нүөмэрдээх орто оскуола үөрэнээччитэ Ростислав Иванов 9 кылааһын сииһиилээхтик бүтэрэн, салгыы орто үөрэххэ туттарсар соруктаах. Ростислав Юнармия киинин кыттыылааҕа.  Тэрэһиҥҥэ бииргэ үөрэнэр оҕолорун кытта сибэкки дьөрбөтүн уура кэлбит.

Ростислав Иванов, Дьокуускайдааҕы 29№-дээх орто оскуола үөрэнээччитэ: «Кутурҕан күнэ, Аҕа дойду Улуу сэриитин саҕаланыыта. Бу күҥҥэ сибэкки уура салайааччыбыт ыҥырда».

Кырыктаах кыргыһыыга олохторун толук уурбут саллааттары, тыылга хоргуйан, концлааҕырдарга муҥнанан өлбүттэри кэриэстээн кинилэргэ сүгүрүйэн, эйэлээх олоҕу уһансыбыттарын иһин махтанан, дойду үрдүнэн тохтобул мүнүүтэтэ биллэриллэр. Бу күн дьоруойдар, буойуттар пааматынньыктарыгар сибэкки дьөрбөтүн, чүмэчи уураллар.

Анастасия Захарова, Дьокуускай олохтооҕо: «Инники көлүөнэ эһээлэргит, хос эһээлэргит окопаҕа сытан, тымныыга тоҥон, итиигэ буһан сэриигэ кыайан төннөн Арассыыйа куораттарын, төрөөбүт дойдуларын сайыннаран, сайдан олорорбутугар ис сүрэхпититтэн махтаныахтаахпыт».

Кутурҕан күнүгэр "Россия - мин историям" мусуойга өйдөбүнньүк тэрээһини ыыттылар. Манна аҕам саастаахтары кытта ыччат, араас түмсүү кыттыылаах көрсүһүү буолла. Урукку кэмҥэ пионер, комсомол баар эрдэҕинэ ыччат бэрт түмсүүлээх этэ диэн көрсүһүү кыттыылаахтара ахталлар. 

Анна Павлова, Дьокуускай олохтооҕо: «Билиҥҥи кэмҥэ ол дьылларбытын наһаа үчүгэйдик өйдүүбүт. Биһиги оҕолорбутун холбуур, түмэр күүс баара буоллар олус үчүгэй буолуо этэ».

Саха сириттэн сэриигэ 60 тахса тыһыынча киһи ыҥырыллан барбытыттан, аҥардара кэриэтэ дойдуларыгар эргиллибэтэҕэ. Кинилэр бары Кыайыы туһугар олохторун толук уурбуттара. Ким да умнуллубат, туох да умнуллубат.