"Мин төрөөбүт дьиэм" айар күрэххэ Анаабыр улууһуттан үлэ бастаата

Хоту дойду күннээҕи олоҕо биир роликка. Кылгас устууга олоххо дьиҥ  таптал, дойду сылаас тыына, төрүт үгэс барыта арылхайдык көстөр. 12 саастаах Арина Туприна күһүҥҥү каникулга ыстаадаҕа сырыытын кэпсиир. Кырачаан кыыс хайдахтаах курдук дьиэтин-уотун, дойдутун таптыырын көрдөрөр.

Оҕо хараҕынан хоту дойду олоҕун укулаатын көрөбүт. Табалардыын алтыһыы, муус аннынан балык үөрүүтэ, бастакы булду амсайыы.  Кырачаан киһи мууска хатааһылыы оонньуура кытта көрөөччүнү олус тардар, умсугутар. Бу үлэ "Мин төрөөбүт дьиэм" диэн ГТРК "Саха" хампаанньа быйылгы сыллаах күрэҕэр муҥутуур кыайыылаах буолла. 

Арина Туприна, "Мин төрөөбүт дьиэм" күрэх грант-при кыайыылааҕа: "Күһүҥҥү каникулга дьоммун кытта тыаҕа тахса сылдьыбыппыт. Онно видеоҕа устубуппут, хаартыскаҕа түһэрбиппит.  Бу матырыйаалларбын куруһуогум учууталын кытта хомуйан күрэххэ ыыппыппыт. Кыайыам диэн эрэлим суох этэ. Кыайбыппын истэн олус диэн үөрдүм, соһуйдум".

Сунтаар улууһун Элгээйи оскуолатын 6 кылааһын үөрэнээччилэрэ оскуола историятын үөрэтэргэ холоммуттар. Киностудияҕа дьарыктанар оҕолор 19 үйэттэн саҕалаан Староватовнар төрүччүлэрин үөрэппиттэрин, тэттик документальнай киинэ гына устан күрэххэ ыыппыттара. Бу үлэ "Дойдум Историята" номинацияҕа кыайыылаах буолла.

Вера Постникова, П.Х. Староватов  аатынан Элгээйи орто оскуолатын бибилэтиэкэрэ: "Барыта 15 оҕо дьарыктанар. Манна биһиги төрөөбүт дойдубут историятын чинчийэбит. Ол түмүгүнэн документальнай киинэлэри устабыт". 

Настя Григорьева, П.Х. Староватов  аатынан Элгээйи орто оскуолатын үөрэнээччитэ: "Оскуолабыт үбүлүөйдээх сылыгар анаан устубут киинэбит күрэххэ анал ааты ылбытыттан олус диэн үөрдүбүт".

Ити курдук  быйылгы күрэххэ ыччат дьон кыттыыта үгүс. Кыайыыны уһансыбыт эһэтин туһунан Алина Еремеева үлэтэ "Дойдуга бэриниилээх буолуу"  диэн анал ааты ылла. Күрэххэ төрөөбүт дойдуга тапталы араас көрүҥүнэн биллэрдилэр. Ол курдук кэпсээн, видео устуу, документальнай киинэ итиэннэ хоһооҥҥо хоһуйуу.  Оттон Любовь Залина төрөөбүт Абыйын туһунан хоһуйуута айар куттаахтарга бастаата.

Любовь Залина,  "Мин төрөөбүт дьиэм" күрэх кыайыылааҕа: "бу күрэххэ кыттары быһаарыммытым уонна “Индигир” өрүс туһунан хоһооммун ыыппытым. Аҕыйах хонуктааҕыта бастаатын диэн эрийэн үөрдүбүттэрэ". 

Кыайыылаахтар бары сыаналаах бириистэринэн наҕараадаланыахтара, оттон муҥутуур кыайыылаах дойдутугар, ол эбэтр Анаабыр улууһугар биһиги хампаанньабыт устар бөлөҕө документальнай киинэ устуоҕа.