Бырабыытылыстыба бөлөҕө Жатай бөһүөлэгэр үлэлээтэ

Жатай судоверфин үлэһиттэрин олорор уопсайдарын тутуу түмүктүүр түһүмэҕэр тиийэн эрэр, тутааччыллар бүтэһик соруктары оҥороллор. Үлэ хаамыытын билсэ, туруоруллубут сыал-сорук төһө сиппитин  миэстэтигэр бырабыытылыстыба бэрэссэдээтэлин солбуйааччы Дмитрий Садовников үлэлээтэ.

Саҥа тутулла турар эбийиэк 7 мэндиэмэннээх, 200 миэстэҕэ анаммыт тутуу буолар. Хас биирдии үлэһиттэргэ хостон ураты манна остолуобай итиэннэ медпуун баар буолара былааннанар. Аныгы ирдэбилгэ толору эппиэттиир хосторго оборуудабанньалары туруорар үлэ барыахтаах.  Ол эрэн билигин даҕаны кэккэ күчүмэҕэйдэр баалларын  оробуочай сырыы кэмигэр быһаарар үлэлэр ыытыллынныллар.

Виктор Романов, СӨ тутуу миниистирэ: «Уопсай тутулла турар, ыараханнардаах эбийиэккэ киирсэр, хойутаан сылдьар. Инники ылсыбыт бэдэрээтчиттэр кыамматылар. Билиҥҥи туруганан 99% бэлэм. Докумуоннара 43% бэлэм. Ый бүтүүтэ госэкспертиза аастаҕына быраһыана ситэн кэлиэхтээх».

Былаан быһыытынан уопсай дьиэ силигин ситэн сэтинньи ыйга үлэҕэ киириэхтээх. Манна судоверфь исписэлиистэрэ уонна тас регионнартан кэлэр үлэһиттэр олорор буолуохтара. Инникиттин тустаах тэрилтэ ыыра кэҥээн, үлэлиир соруга улаатыахтаах.

Салгыы хамыһыйа "Точка будущего" саҥа үлэҕэ киирээри сылдьар үөрэх уораҕайыгар барар суолга туох үлэ ыытылла турарын көрдө. Аартыгы киллэрии үлэлэр Дойду президенын Владимир Путин көҕүлээбит национальнай бырайыагын чэрчитинэн олоххо киирэр.

Дмитрий Садовников, СӨ бырабыытылыстыбатын бэрэссэдэээтэлин бастакы солбуйааччыта: «Көрбүт эбийиэктэрибитигэр чааһынай харчыга тутулла турар “Школа будущего” көрдүбүт. Манна өрөспүүбүлүкэ эбээһинэһэ суол тутуута 1,6 км. Бэдэрээччит күүстээхтик үлэлии сылдьар. Матырыйаала барыта баар. Оскуола арыллыытыгар суол арыллыахтаах. Боппуруостарын барытын быһаардыбыт».

"Точка будущего" үөрэх кыһата бу күһүн балаҕан ыйын 1 күнүгэр аанын тэлэччи арыйыаҕа. Онон бу сайын устата манна күүстээх үлэ ыытыллан бара туруоҕа.