Туймаада стадиоҥҥа күн ахсын 250 тахса киһи дьарыктанар

Хара сарсыардаттан Туймаада стадиоҥҥа киин куорат олохтоохторо дьарыктаналлар. Манна үксэ эдэр ыччат эрчиллэр. Оннук курдук Рустам Федоров тураатын кытары дьарыгын саҕалыыр. Кинини кытары тэҥинэн бииргэ үлэлиир доҕотторо кэлсэннэр саха дэгит күрэһининэн дьарыктаналлар.

Рустам Фёдоров, Дьокуускай олохтооҕо: «Чөл олоҕу тутуһуохха наада, успуордунан дьарыктаныахха наада. Успуорт да буолбакка физкультура да буоллун, киһи хайаан да күҥҥэ биирдэ эрчиллиэн наада».

Сарсыарда 6:00 саҕалаан Туймаада стадиоҥҥа олохтоохторго зарядка бириэмэтэ саҕаланар, онтон 9-тан киэһээ 11 чааска диэри сүүрүүнэн дьарыктаныы барар. Ону таһынан Сайсары күөл кытылыгар эттэрин - хааннарын сылытар дьон эмиэ баар. 

Олохтоохтор спортка көхтөөх сыһыаннарынан уонна маассабайдык дьарыктаналларынан Саха сирэ Уһук илиҥ бэдэрээлинэй уокурукка иккис миэстэни ылар. Оннук курдук бүтүн дойдутааҕы бырайыактар чэрчилэринэн өрөмүөннэр ыытыллаллар уонна оҕо сатабылын сайыннарар кииннэр арыллаллар.

Спорт эбийиэктэрин усулуобуйата тупсан, дьон тоҕуоруһара, дьарыкка талаһара элбээн иһэр диэн Туймаада стадионун тренерэ Николай Цыпандин этэр. Биирдиилээн дьону тэҥэ, бүтүн бөлөҕүнэн кэлэн эрчиллэллэр.

Николай Цыпадин, "Туймаада" стадион футболга секциятын тренерэ: «Нэдилэтээҕи дьон хас сылдьыбытын ааҕабыт, статистика оҥоробут. Сарсыарда чэбдигирдэр сүүрүү, зарядка буолар, ортотунан 250 киһи күҥҥэ кэлэн барар. 8 чаастан саҕалаан тэрилтэлэр, спортивнай оскуолалар, лааҕыр оҕолоро кэлэн дьарыктанан саҕалыыллар».

Өрөспүүбүлүкэ үрдүнэн тохтоло суох физкультуранан уонна спордунан дьарыктанааччы ахсаана 5 сыл иһигэр балтараа төгүл үрдээтэ.