ХИФУ ботаническай саада сэдэх үүнээйилэри харыстааһыҥҥа үлэлэһэр

Саха сирин сайынын биир кэрэ көстүүтэ - сибэккилээх мастар тыллыылара. Университет ботаническай саада билигин араас дьэрэкээн өҥнөөх чэчиккэ сууланан турар. Ордук көстүүлээхтэрэ - бу мааны яблоня. Бытархай отон саҕа астаах мас, сайынын олус кыраһыабайдык сибэккилэнэр. Маҥан бөдөҥ эрбинньэхтэрдээх буолан ураты кэрэ көстүүлээх. 

Розалия Докторова, М.К. Аммосов аатынан Хотугулуу-Илин федеральнай университет ботаническай садын дендролога: «Яблоняны уһаайбабытын киэргэтээри ылабыт. Аһа кыра баҕайы буолар, хомпуот уонна барыанньа оҥоруохха сөп. Туспа буор оҥорон кутуохха наада, сибиэһэй перегнойа суох, кумаҕы сөбүлүүр, күнү сөбүлүүр. Үчүгэйдик көрдөххө 5-6 сылыттан сибэккилээн барар».

Университет саадыгар мастар үөрэтэн көрүүгэ, чинчийиигэ анаан олордуллаллар. Итини сэргэ сэдэх үүнээйилэри харыстыыр сыаллаах. Билим эйгэтигэр биир саамай харыстанар уонна киэн туттуллар мас бу турар. Рябинокизильник диэн ааттаах.

Дендролог идэлээх Розалия Докторова саад маһын барытын бүөбэйдиир. Күннэтэ бу курдук кэрийэ сылдьан туруктарын көрөр-истэр. кини ааспыт күһүн олус эмискэ тымныйан, мастар кыһыҥҥыга бэлэмнэммэккэ эрэ утуйбуттарын этэр. Онон элбэх талах  лабаалара үлүйбүт. Ол иһин быйыл көрүүлэрэ элбэх. 

Маны сэргэ үүнээйилэр чинчийии, үөрэтии кэннэ нэһилиэнньэҕэ тарҕатыллар сыаллаах олордуллаллар. Холобур, сирень, яблоня сиэмэттэн таһаарыллар буолан холкутук Саха сирин кыһынын тулуйар. 

Розалия Докторова, М.К. Аммосов аатынан Хотугулуу-Илин федеральнай университет ботаническай саадын дендролога: «Акация, яблоня, рябина уонна сирень венгерская диэн баар. Ону наһаа сөбүлүүллэр, кырасыабай баҕайытык сибэккилэнэр. Кыстыыллар, бүрүйэр наадата суох».

Саад аана куруутун аһаҕас. Ким баҕалаах кэлэн кэрэ көстүүнү көрүөн, хаартыскаҕа түһэн үйэтитиэн сөп. Маны сэргэ мастар саамай тыыллан силигилээн турар кэмнэригэр анал тэрээһиннэри ыыталлар. Холобур, бу өрөбүлгэ яблоняҕа аналаах көрсүһүү тэрийэллэр.