Саха сиригэр күөх луугу хомуйуу саҕаланна

Тулагы-Киллэм ытык туонатыгар бастакы сир аһын хомуйааччылара тоҕуоруһаллар. Быйылгы сааскы халаан нэлэмэн хонууну уунан кутан, күөх луук дэлэйдик үүммутэ бэлиэтэнэр. Кырдьык, сир аһа өлгөмнүк үүммүтүн, сылгы ньургуһуннара  тыалга охсуллан суугунуу тураллара туоһулуур. Тустаах нэһилиэк олохтооҕо Яна Ильина оҕотун кытары айылҕаҕа тахсыбыт.

Яна Ильина, Тулагы-Киллэм олохтооҕо: «Бэс ыйын саҕана арыый эрдэ эбит, арыыга лууктуу барыахпыт. Оҕобун үөрэтэбин. Син үргээтибит».

Саха сиригэр күөх луук хас да көрүҥэ үүнэр диэн исписэлиистэр бэлиэтииллэр. Маҥнайгы бөлөххө - ходуһаҕа, хомоҕо, өрүс кытыыларыгар үүнэр луук, онтон иккис, амтанныын да минньигэс, алаас сүмэһиннээх ото буолар.

Чахчы, үөрэхтээхтэр бэлиэтиллэринэн үгүс сир аһыттан саамай үтүмэн битэмииннээх үүнээйинэн луук буолар. Ис-үөс ыарыларыттан саҕалаан, сүрэх уопсай туругун кытары чэбдигирдэр диэн наука дакаастаан турар.

Елена Пестерева, СӨ тыа хаһаайыстыбатын чинчийэр институтун сүөһү аһылыгын бэлэмниир лаборатория сэбиэдиссэйэ,  тыа хаһаайыстыбатын наукатын доктора: «Элбэх А уонна С битэмиининэн биллэр уонна цинк баар. Ол биһиги ис турукпутугар, сүрэххэ, оҕолорго иммунитеты таһаарарга даҕаны уонна оһоҕос үлэтигэр туһалаах».

Сайын бастакы бэлэҕин - күөх луугу араастан бэлэмниэххэ сөп диэн асчыттар бэлиэтииллэр. Унньулҕаннаах уһун кыһыҥҥа сөпкө бэлэмнээһин эмиэ бэйэтэ кистэлэҥнэрдээх.

Михаил Аввакумов, “Тыгын Дархан” ресторан асчыта: «Кырбаан баран баанкаҕа тууһаан кэбиһэбит уонна тоҥоро ууран кэбиһэбит, эбэтэр мээнэ кырбаан баран тоҥоруохха сөп».

Билигин луук дьэ ситэн, сүмэһинин иҥэринэн турар кэмэ. Онон унньулҕаннаах уһун кыһын кэнниттэн айылҕалыын алтыһар кэм үүнэн, сир аһын хомуйуу маҥнайгы кэрдииһэ үүннэҕэ.