Ойуунускай аатынан уулуссаны саптылар

Бэс ыйын 3 күнүттэн саҕалаан Ойуунускай аатынан уулусса сабылынна. Манна хас да сыл күүтүллүбүт өрөмүөн үлэтэ барыаҕа, аспаал саҥаттан ууруллуоҕа. Маны сэргэ канализация, ыраас ууну ыытар турбалары уларытыахтара.

Айгылаан Григорьев, "Дороги Саха" тэрилтэ суол оҥоруутун участагын салайааччыта: "Уоппутугар билигин көҥүл ылыахтаахпыт. Оччоҕо урукку остуолбалартан саҥа остуолбаларга ситими уларытыахпыт. Итиэннэ эргэлэри көтүрүөхпүт. Петровскай уулуссаттан Каладаришвилига диэри суолу кэҥэтиэхпит".

Үлэлиэхтээх улахан тиэхиньикэлэр миэстэлэрин буллулар. Бастатан туран, сири хаһан, канализация турбатыгар тиийиэхтээхтэр,  салгыы суолу көннөрүөхтээхтээр. Ол эрэн бастакы үлэ күнүгэр номнуо харгыстар үөскээтилэр. Сир анна барыта уу буолан, эбии ууну оботторор тиэхиньикэ наада буола.

"Суолу эрэ буолбакка, суол анныгар баар барыта өрөмүөннэниэхтээх. 2027 сылга уот остуолбалара уларыйыахтаах уонна гаас ситимэ тардыллыахтаах", - Афанасий Канаев, корреспондент.

Ойуунусай аатынан уулусса Дьокускай киин суола буолар, онон кыра да кэрчик сабыллыыта айанньыттарга уустуктары үөскэтэр.Бу кыһалҕа тута болҕомтоҕо ылыллан, тумнар суоллар оҥоһуллуналар. Айанньыт да олохтоох да суол тупсуутугар үөрүүтэ улахан. 

Бу кэрчик суолга былааннаммыт үлэни бэс ыйын 24 күнүгэр диэри түмүктүөхтэрэ. Үлэ саҥа саҕаламмыт буолан бүгүн аҕыйах тиэхиньикэ үлэлиир, тэтимиттэн көрөн тиэхиньикэ ахсаана элбиэҕэ.

Владимир Комаров, "Дороги Саха" тэрилтэ үлэһитэ: "Суол аттыгар баар дьиэлэр канализацияларын турбата уларыйыа. Уопсайынан бары ситим саҥардыллар. Ол курдук гаас ситимэ эмиэ. Ууну аһардар ханаал Петровкай уулуссаны кыйа барыа".

Суолу тупсарыы үлэтэ "Олоххо-дьаһахха аналаах инфраструктура" национальнай бырайыак чэрчитинэн барар. Толору тупсан,  киэргэйэн аныгыс сылга түмүктэниэҕэ.