Өлүөнэ күргэтин сүрүн тирэҕин сыбаайаларын кутарга аналлаах тимир тутууну өрүскэ киллэрдилэр

Сарсыарда 6 чааска Өлүөнэ эбэ кытылыгар улахан суолталаах тэрээһиҥҥэ бэлэмнэнии үгэнэ. Ирбэт тоҥ усулуобуйатыгар аан дойдуга бастакы бөдөҥ тутуу. Сотору кэминэн Саха сирин олохтоохторугар саамай күүтүүлээх муоста уу анныгар үлэлииргэ аналлаах болгуо хаайыытын өрүс уҥа кытылыгар таһаарыахтара. Бу түгэҥҥэ бэлэмнэнии эрдэттэн ыытыллыбыта. 

Артур Тарабукин, техническэй сакаастыыр сулууспа салайааччытын солбуйааччы: "Сотору кэминэн коффердамы туоратыахпыт. Уҥа кытылга быстах кэмҥэ турар сиригэр илдьиэхпит. Бу ыйга коффердам турар сиригэр дириҥэтии үлэтэ ыытыллыахтаах". 

Биэс этээстээх дьиэ үрдүктээх, иккиттэн тахса тыһыынча туонна ыйааһыннаах тимир конструкцияны 3 буксир баржа көмөтүнэн анараа кытылга тиксэрэллэр. Бастаан туруохтаах сирин булларан быстах кэмҥэ туруораллар, онтон дириҥэтэн бырайыак балаһыанньатынан оҥоруохтара. Бу тиксэриллэр коффердам 10№-дээх тирэх  киэнэ. 

Михаил Акимов,  "ВИС Строй" тэрилтэ оҥорон таһаарар техническэй салаатын салайааччыта: "Коффердам сайыннары кыһыннары үлэлиирбитин хааччыйар. Бу үрдүгэр туран дьыл хайа баҕар кэмигэр буурдуур массыыналар үлэлиэхтэрэ. Арай муус барар эрэ кэмигэр тохтуу сылдьыахпыт".

Ити курдук ньыманы туһанан оҥоһуллубут муоста Өлүөнэ хайа баҕар күүстээх сүүрүгүн, өрүс барыытын тулуйуохтаах. Уосайа күргэ тутуутугар барыта 3 коффердам туттуллуоҕа. Билигин иккитэ толору хомуллан турар. Коффердамы 2 килэмиэтир усталаах миэстэҕэ тиксэрии барыта былаан быһыытынан туох да уустуга суох ыытылынна. 

Антон Крупнов, "ВИС" бөлөх тутууга бырайыагын дириэктэрэ: "Улахан ууну баттаһа коффердам быстах кэмҥэ турар сиригэр тириэрдилиннэ, бу дириҥэтии үлэтин аччатыа. Бу нэдиэлэттэн өрүс түгэҕин дириҥэтии тэтимнээхтик саҕаланыа. От ыйын бүтүүтэ коффердамы бырайыактаах сиригэр туруоруохпут".  

Бу өрүһүнэн ыытыллыбыт тэрээһин Өлүөнэ күргэтин тутуутун сүрүн түһүмэхтэриттэн биирдэстэрэ. Коффердамы туттуу технологията бүтүн дойду үрдүнэн аан бастакытын ыытыллар. Оттон муоста тутуута өссө 3 сыл устата тардыллыаҕа.

Владимир Сивцев, СӨ транспорт уонна суол-иис хаһаайыстыбатын миниистирэ: "Өлүөнэ муостатын тутуу болдьоҕунан барар.  Президент В.В. Путин ыйааҕынан 2028 сылга диэри тутууну түмүктүөхтээхпит. Билиҥҥитэ былаан быһыытынан баран иһэр". 

Мантан сайын муостаны тутуу күннэтэ тохтоло суох ыытыллара күүтүллэр.