Аҕа дойду Улуу сэриитин бэтэрээнэ Кирилл Павлов 100 сааһын туолла

Аҕа дойду Улуу сэриитин бэтэрээнэ Кирилл Павлов 100 сааһын туолар дьоро тэрээһин. Өрөспүүбүлүкэ сүрүн саалатыгар кини дьиэ кэргэнэ, чугас дьоно, Саха сирин уопсастыбаннаһа, салалтата мустубут. Кирилл Егорович  "Үйэ саас" диэн ытык биэлэни сүһүөҕүн үрдүгэр туран эрэ дьоһуннаахтык  кэтэр.

Кирилл Павлов, Аҕа дойду Улуу сэриитин бэтэрээнэ: "100 сааспын оҕолорум, доҕотторум, чугас дьонум уонна өрөспүүбүлүкэ салалтатын көмөтүнэн туоллум. Бу туһунан бүгүн этиэхпин баҕарабын".

Кирилл Егорович  педагогическай училищеҕа үөрэнэ сылдьан 1944 сыллаахха фроҥҥа ыҥырыллан барбыта. Онон кини сэрии кэмигэр Саха сиригэр сатыылаабыт уот курааны, аас- туор олоҕу, онтон уоттаах сэриини бүтүннүү этинэн-хаанынан билбитэ. Онтон сэрии кэннэ кини чөлүгэр түһэриигэ улахан сыратын уурбута. Кирилл Егорович Бүлүү улууһун 17 сыл тухары салайан олорбута. Бу кэмҥэ улуус балысханнык сайдыбыта, ити кэннэ  үс уочаракка үрдүкү сэбиэт депутатынан талыллан үлэлээбитэ. Кирилл Егорович олоххо көхтөөх тэтимин билигин да ыһыктыбат.

Георгий Степанов, СӨ Бырабыыталыстыбатын бэрэссэдээтэлин солбуйааччы: "Кини билигин даҕаны, нууччалыы эттэххэ “в строю”. Дьону-сэргэни, ыччаты кытта көрсөр. Туох баар сэрии өйдөбүнньүк тэрээһиннэригэр кыттар. Бастакынан кини кэлээччи". 

Үбүлүөйдээх күҥҥэ Кирилл Егоровиһы бастыҥ салайааччы, норуот туһугар турууласпыт депутат быһыытынан аҕыннылар. Оттон оҕолоро кини дэгиттэр талааннаах, үгүс дьоҕурдаах холобур буолар аҕа буоларын үллэһиннилэр. Кирилл Егорович хаартыскаҕа түһэриинэн, видео устуутунан үлүһүйэр. Кэнники сылларга 10 тахса кинигэни таҥан таһаарда. Итини сэргэ маһы ыллатар уран уус. 

Александр Павлов, Кирилл Павлов уола: "Оҕо эрдэхпиттэн миигин батыһыннара сылдьан, мин соҕотох уол буоллаҕым дии, уһанарга үөрэппитэ. Онон билигин мин дьиэбин бэйэм тутабын, оҕолорум уонна сиэннэрим эмиэ кыттыһаллар". 

Ытык киһиэхэ өссө да уһун, чөл, көхтөөх олоҕу баҕардылар. Кирилл Павлов дьоһуннаах олоҕун суола үгүс көлүөнэ ыччакка холобур буолар.