Уһуйаан иитээччилэрэ төрүт тылы уонна култуураны харыстааһын тула дьүүллэстилэр

Киин куоракка оскуола иннинээҥҥи үөрэхтээһиҥҥэ  төрүт тыл уонна култуура эйгэтин тула кэпсэттиллэр. Дойду таһымнаах научнай кэмпириэнсийэҕэ өрөспүүбүлүкэҕэ уһуйааннарын үлэһиттэрэ уопут атастаһа, саҥаны билэ-көрө кэллиллэр. Тэрээһини Дьокуускай куорат үөрэҕириитин салалтата иилэн-саҕалаан ыытта.

Тэрээһин уопсайа  1000-тан тахса кыттааччыны түмтэ. Россия атын регионнарыттан оскуола иннинээҕи үөрэхтээһин үлэһиттэрэ кыттыыны ыллылар. Киин куоракка кэмпириэнсийэ, мунньах ыытыллынна.

"Кэмпириэнсийэ чэрчитинэн уһуйаан иитээччилэрин быыстапката турда. Ол курдук уопсайа 30 үлэ манна турда", - Анастасия Добрянцева, корреспондент.

"Этносувенир - өбүгэ ситимэ" диэн ааттаах быыстапка уһуйаан үлэһиттэрин талаанын арыйар соруктаах туруорулунна. Манна өрөспүүбүлүкэ оҕо саадтарыттан үгүс үлэ кэлбит. Быыстапка эрэ буолбакка оҥоһуктары күрэх быһыытынан дьүүллүүр сүбэ сыаналаата.

Альбина Борисова, Дьокуускайдааҕы үөрэх салалтатын оскуола иннинээҕи үөрэх салаатын исписэлииһэ: "Булуҥ, аллайыаҕа курдук ыраах улуустартан тиийэ үлэлэр кэллилэр. Дьүүллүүр сүбэ быһаарытынан Бүлүү куоратыттан оҥоһук кыайыылаах таҕыста. Элбэх үлэ киирбитин иһин бастакы үс бириистээх миэстэни таһынан өссө үс анал ааты анаатыбыт".

Бүлүү куорат оҕо уһуйаанын исписэлиистэрин үлэтэ кыайары ситистэ. Лариса Шамаева тустаах улуус бэрэстэбиитэлэ Дойду таһымнаах тэрээһиҥҥэ кыттыытыттан, ону таһынан кыайыы өрөгөйүн билэн үөрэр.

Лариса Шамаева, Бүлүү улууһун уһуйаанын үлэһитэ: "Салалта оскуолата диэҥҥэ сылдьабыт. Бу оскуола 1994 сыллаахтан саҕаламмыта. Бастаан Елена Колесова салайан саҕалаабыта. Билигин салҕыы үлэлии турар. Бу оскуолаттан элбэххэ үөрэнэбит".

Манна даҕатан эттэххэ, Дьокуускай куоракка күн бүгүн 54 оҕо саада үлэлии турар. Сыллата уһуйаан саастаах оҕолор элбииллэр, ону кытары тэҥҥэ кырачаан дьон сылдьар эбийиэктэрин элбэтиигэ үлэ барар. Ону бу тэрээһиҥҥэ тоһоҕолоон эттиллэр.

Мария Петрова, Дьокуускайдааҕы үөрэх салалтатын салайааччыта: "Спортивнай” түөлбэҕэ саҥа уһуйааны арыйдыбыт. Бу сылга уһуйаан салаата адаптивнай кииҥҥэ арыллыа. 2027 сыл бүтүөр диэри икки уһуйаан тутуута саҕаланарын күүтэбит. Итиэннэ куорат маастар-былаанынан 2032 сылга диэри эбии 15 уһуйаан тутуллуохтаах".

Уһуйаан үлэһиттэрин түмэр, билиилэрин хаҥатар тэрээһин киин куоракка 3 күн устата ыытыллынна. Оскуола иннинээҕи үөрэхтээһиҥҥэ төрүт үгэстэри тутуһууга үлэ барара кэскиллэннэ.