Хаһаайыстыбалар сайылыкка тахсан үрүҥ илгэни сомсоллор

Улахан Аан олохтооҕо Валерий Никифоров сыллата Уу Көхсө алааска тахсар. Сайылыкка "Бөртө" хаһаайыстыба фермата  баар буолан 3 ынаҕын үүтүн кэлэн туттарар. Киэһээҥҥи ыам түмүктэнэн 3 пиэрмэттэн мунньуллубут үүтү манна сыахха ытыйаллар. 

Валерий Никифоров, Улахан Аан нэһилиэгин олохтооҕо: "22 лиитэрэ буолар, онтон ордубат. Күөххэ саҥа үктэннилэр, дьэ онтон элбиэ. Муҥутаан 45 лиитэрэҕэ тиийээччи".

Үүтү туттарар кэтэһиилээх массыына кэлэн, киэһээҥҥи ыам үүтүн сэппэрээтэргэ ытыйыахтара. Күн бүгүн хаһаайыстыба 3 ферманан икки аҥаар туонна үүтү ыы олорор. Сыах оператора Анна Матвеева үүт сыатын бэрэбиэркэлиир

Анна Матвеева, сыах оператора: "Үүппү сыата саамай үрдээбитэ 5 тахсар. Оттон саамай кыччаабыта 3 буолар". 

Бу Куоһаҕас сайылыкка 130-тан тахса ыанар ынах турар, 3 ыанньыксыт күҥҥэ иккитэ ыыр. Валентина Трофимова фермаҕа үлэлээбитэ 40-тан тахса сыл буолла, үйэтин тухары ыанньыксытынан, кэнники сылларга операторынан үлэлии-хамсыы сылдьар.

Валентина Трофимова, ыам оператора: "Күҥҥэ 500 лиитэрэни ыыбыт. Үүппүт кыралаан эбиллэн эрэр. Халлаан тымныы буолан үүппүт тахсыбакка сырытта, хойуккуларбыт саҥа төрөөн эрэллэр".

"Бөртө" хаһаайыстыба үрдүнэн 400 ыанар ынах баар. Улахан аҥаардара 80% кэриҥэ төрөөн тураллар.

Ульяна Семёнова,  "Бөртө" сылгы собуотун биригэдьиирэ: "2,5 туоннаны ыы сылдьабыт. Сотору 4-5 туоннаҕа тиийиэхпит. Онон 1300 туоннаны толоруохпут диэн санаа баар. Ол эрэн халлаан хайдаҕыттан, мэччирэҥ туругуттан көстүө. Биһиги үлэбит айылҕаттан тутулуктаах ". 

Сыахха үүтү күҥҥэ иккитэ түһэрэллэр. Сарсыардааҥҥы, киэһээҥҥи үүтү ытыйан сүөгэй оҥорон бэлэмнииллэр.

"Улахан Аан сүөгэйэ Саха сиригэр нэһилиэнньэ киэҥ билиниитин ылар, үрдүк хаачыстыбалааҕынан биллэр. Сыахха күн бүгүн 400 гр. иһиттээх 300-чэкэ устуука сүөгэйи бэлэмнээн таһаараллар. Мантан сайын бородууксуйа кээмэйэ өссө элбиирэ күүтүллэр ", - Татьяна Николаева, корреспондент.

Сүөгэйи олохтоох нэһилиэнньэҕэ, улууска уонна куоракка маҕаһыыннарынан тарҕаталлар. Үүт аһы астыыр туспа сыахтарыгар хас да көрүҥ үүт бородууксуйатын бэлэмниллэр. Быйыл Саха сирин үрдүнэн үүт былаана 60  тыһыынча туоннаттан тахсаҕа тэҥнэһэр. Үүтү бэлэмнээһин кээмэйин аччаппат туһунан быһаарыы быраабыыталыстыба уонна муниципалитет таһымыгар бигэргэтиллэн турар.