Уһук илиннээҕи футбол лиигатын оонньуулара Саха сиригэр

Үгэс быһыытынан хамаандалар эҕэрдэлэһэн  оонньуу саҕаланар. Дьокуускай куоракка улахан футбол күрэхтэрэ саҕаланныллар. Күн бүгүн Николай Тарскай аатын сүгэр стадиоҥҥа Уһук Илин регион ЮФЛ лиигатын оонньуулара ыытыллан, Саха сирин футболу сэҥээрээччилэрэ успуорт уораҕайыгар муһуннуллар.

Приморскай кыраайтан кэлэ сылдьар ыалдьыттар Динамо-Владивосток хамаанда биһиги уолаттарбытын кытары оонньууллар. Саха сирин чиэһин футбол оскуолата көмүскүүр.

Николай Цыпандин, Өрөспүүбүлүкэтээҕи футбол оскуолатын салайааччыта: «Ыччаттарга лига күрэхтэһиитэ буола турар. Бу күрэхтэһиигэ 2021 сылтан кыттабыт. Саҥа саҕалаатыбыт, иккис тур буола турар. Бу иннинэ 2008 сыллаах оҕолорбут 3 миэстэ буола сылдьыбыттара».

Манна даҕатан эттэххэ, Өрөспүүбүлүкэтээҕи футбол оскуолатыгар билигин 584 оҕо дьарыктанар. Мэҥэ-Хаҥалас, Хаҥалас уонна Нүөрүҥгүрү оройуоннарыгар филиаллар үлэлииллэр. 65 үлэһит оҕолору футбол көрүҥэр сыһыарар.

18-таах уолаттар оонньууларын иннинэ 16 саастаах оҕолор оонньообуттара. 8 сылын Өрөспүүбүлүкэтээҕи футбол оскуолатыгар дьарыктанар Артем Апросимов туох баар кыахпытынан оонньоотубут диэн санаатын үллэһиннэ.

Артём Апросимов, Өрөспүүбүлүкэтээҕи футбол оскуолатын иитиллээччитэ: «Үчүгэйдик оонньоотубут эрээри, кыратык тиийбэтэ кыайыарга диэри. Уолаттар маладьыастар, үчүгэйдик оонньоотулар».

Олох кыранан кыайбатыбыт диэн тренер Прокопий Федоров иһитиннэрэр. Ол да буоллар биһиги спортсменнарбыт Приморскай кыраай футболистарын кытары тэҥнээхтэрин курдук оонньообуттар.

Прокопий Фёдоров, Өрөспүүбүлүкэтээҕи футбол оскуолатын тренерэ: «Тренер эппитин толордулар. Кинилэри бастакы кылаастан дьарыктыыбын. Саха сиригэр буолар күрэхтэһиилэри үксүн барытын кыайбыппыт».

Онтон салгыы лига оонньуута сайын устата стадиоҥҥа ыытылла туруоҕа, тэрийээччилэр биһиги хамаандабытын өйүү кэлэргитигэр ыҥыраллар.