Өрөспүүбүлүкэҕэ тымныы ардахтаах күн-дьыл турар
Киин куоракка күүстээх балаһа тыал. Өрөбүл күнтэн саҕалаан ардахтаах тымныы күннэр тураллар. Күнү-дьылы кэтээн көрөөччүлэр этэллэринэн Кытай хоту өттүттэн сис былыт халыйан кэлбит. Маныаха Дьокуускайга намыһах сирдэргэ улахан чалбахтар үөскээн оботторуу үлэтэ күүһүрэр.
Түүннэри-күнүстэри 3 симиэнэн ардах уутун утары охсуһаллар. Аҥаардас биир түүн 300 куубтан тахсаны оботтордулар. Болҕомто куорат улахан уулуссаларыгар ууруллар, онтон сатыы дьон суолу туоруур сирдэригэр, ол кэннэ кытыы уулуссаларга киирэллэр.
Николай Наумов, "Жилкомсервис" тэрилтэ тырааныспарга салаатын салайааччы: «Прогноз көрөбүт уонна ардах түһэрин сабаҕалаан массыына таһаарабыт. Сууккаҕа 10-ча массыына тахсар. Бэйэбит күүспүтүнэн кыайбат буоллахпытына бэдэрээччиттэри таһаарабыт».
Бу курдук өрөспүүбүлүкэ бүттүүнүгэр хаҕыс күннэр тураллар. Оттон Алдан оройуонугар олох да инчэҕэй хаар түһэр. Булуҥ, Дьааҥы уонна Эбээн Бытантай улуустарыгар кыһыҥҥылыы сөҥүүлээх күннэр тураллар. Ити курдук соҕуруу, арҕаа, киин улуустарга нуорматтан намыһах кыраадыс бэлиэтэнэр, тыал күүһэ сөкүүндэҕэ 15 миэтэрэҕэ тэҥнэһэр. Онон 3-4 күннээҕитэ 30 кыраадыстаах итии түһэ сылдьыбытын олох да мэлдьэстэ.
Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаа салайааччыта: «10-15 кыраадыһынан тымныйда. Ааспыт күн соҕуруулуу циклона киирэн Нүөрүҥгүрү, Өлүөхүмэ улуустарыгар күүстээх ардаҕы аҕалла. Бу түүн манна өссө да ардыа. Киин оройуоннарга чэппиэргэ дылы тымныы күн-дьыл туруо. Нэдиэлэ бүтүүтэ күнтэн-күн сылыйан иһиэ. Киин куоракка ыам ыйын 26 чыыһылатыгар ардахтаах тыаллаах күн-дьыл».
Халлаан туругун кытта муус барыыта ыкса сибээстээх. Билигин сүрүн болҕомто Алдан эбэҕэ. Манна Уус Маайа улууһугар уу таһыма тахса турар. Сууккаҕа муҥутаан 3 миэтэрэни эбиллэрэ бэлиэтэнэр. Томмот куоратын аннынан эмиэ уу дохсуннук тахсар.
Петр Аргунов, Өлүөнэтээҕи уу салалтатын салайааччы: «Томмот куорат аннытыгар 12 чаас устата уу таһыма үрдээн 8,19 м буолла. Кутталлаах таһым 8,20 м. Бу кэлэр күн уу таһыма үрдээн өссө 8,4 м дылы улаатыа диэн сабаҕалаан көрөбүт».
Нэдиэлэ бүтүүтэ халлаан сыыйа сылыйыа, Дьокуускайга күнүһүн +18 кыраадыс буолара күүтүллэр. Бу өрүс этэҥҥэ барыытыгар эмиэ олус көмөлөөх буолуо.