Дьокуускайга "Ытык сир" дьон мустар түһүлгэтэ арыллынна

Дьокуускайга "Ытык сир" дьон сэргэ түмсэр түһүлгэтэ арыллынна, тэрээһин үс алгысчыт кыттыылаах кыстыгы туораан, күөххэ үктэммиппитин туоһулаан алгыһынан саҕаланна.

Түһүлгэ өбүгэлэрбит күнү көрсүү сиэрин-туомун оҥоро сылдьалларын ойуулуур, ол аата ситими быспакка кэлэр кэнчээри ыччакка тиэрдиллэр.  Бырайыак сүрүннээччитинэн Афанасий Федоров - Охонооһой буолар, үлэ барыта ситэригэр 1,5 сылы быһа 10-тан тахса мас уустара, ону тэҥэ Монголияттан тиийэ кэлэннэр үлэлээбиттэр.

Николай Чоччасов, скульптор: «Аныгыскы көлүөнэлэр умнан кэбиэһиэхтэрэ диэн өйдөбүнньүк курдук хааллардахпыт. Кэлиҥ, көрүҥ, сэргээн. Алгыс ылар сир буолар».

Үөрүүлээх арыллыыга эдэрдэриттэн саастаах дьоҥҥо тиийэ бары кыттыыны ыллылар, маннык оҥоһуу Дьокуускай куоракка аан маннайгытын тутуллубут буолан дьон-сэргэ биһирэбилин биллэрдик ылла. "Ытык сир" түһүлгэтин ыалдьыттара оҥоһуктары харыстыахха, кэтэбилгэ ылыахха наада диэн санааларын этэллэр.

Дойду Президенэ Владимир Путин "Табыгастаах куорат эйгэтин үөскэтии" бырайыагын чэрчитинэн  арыллыбыт "Ытык сир" бырайыак силигин ситтэ, инникитин бу бырайыак сайдар кэскиллээх.

Евгений Григорьев, Дьокуускай куорат баһылыга: «Саха сирин дьонун буола турар куоластааһыҥҥа "Табыгастаах куорат эйгэтин үөскэтии" диэҥҥэ киирэн икки мүнүүтэ анаан куоластаан, оччоҕуна бу бырайыак өссө тутуллан үүнэн бара туруоҕа».

Бу бырайыак  сайдарыгар, иккис түһүмэххэ олохтоохтор туора турбакка Госуслуги нөҥүө куоластыаххытын сөп, онтон "Ытык сир" түһүлгэтигэр нэһилиэнньэ хаһан баҕарар кэлэн ыраастанар, күүс ыла кыахтаах.