Өрөспүүбүүкэ баһаары утары сулууспалара айылҕаҕа уоттан сэрэхтээх буолуу ирдэбилин билиһиннэрэллэр

Дьокуускай куорат олохтооҕо Сахаяна Петрова өрөбүл күннэри баттаһа Владимировка эҥээр бииргэ үлэлиир дьонун кытары сынньана тахсыбыт. Эрдэттэн ох курдук оҥостон, ирдэбили, быраабыланы тутуһан уот оттон минньигэс шашлык сиэбиттэр.

Сахаяна Петрова, Дьокуускай куорат олохтооҕо: «Эрдэттэн бэлэмнэнэн эппитин буһардылар. Ол кэмҥэ биһиэхэ МЧС үлэһиттэрэ кэлэн инструктаж ыыттылар, барытын үчүгэй баҕайытык кэпсээтилэр, быһаардылар. Маннык үлэ барара сөптөөх дии саныыбын».

Таһырдьа самаан сайын салаллан кэлэн, айылҕалыын алтыһар дьон үксүүр. Ону кытары тэҥҥэ Ыксаллаах быһыы-майгы министиэристибэтин уонна Саха Өрөспүүбүлүкэтин баһаары утары сулууспатын үлэһиттэрэ. Бу кэмтэн ыла айылҕаҕа сылдьыы ураты хонтуролга турар.

Евгений Габышев, ЫБММ Саха сиринээҕи салалтатын баһаар кэтэбилин судаарыстабаннай иниспиэктэрэ: «Ыам ыйын 8 күнүттэн өрөспүүбүлүкэ үрдүнэн Ил Дархан ыйааҕынан баһаартан сэрэхтээх буоларга балаһыанньа тэриллибитэ. Ону сибээстээн ас буһарарга аһаҕас уоту туттар бобуллар, кураан оту өртүүр, бөх уоттуур бобуллар».

Бу күн олус элбэх сынньаннааччы бу эҥээр тахсыбыт. Инспектордар барыларын кытары профилактическай- сэрэтэр үлэни ыытыллар. Уоту хайдах сөпкө оттору, айылҕа суоруллубат быраабылалырын өссө биирдэ санаттылар. Бу күн кэлбит дьон үгүһү биллибит диэн санааларын үллэстэллэр. Сорохтор уоту умаппат туһугар дьиэлэригэр астанан кэлбиттэр.

Наталья Михайлова, Дьокуускай куорат олохтооҕо: «Алаадьы, биһи бэйэбит төрүт аспытын астааммыт кэлэн сынньана сылдьабыт. Бэлэм астаах кэлэммит, Ньукуолун күнүн наһаа үчүгэйдик көрүстүбүт».

Онтон Саха сиригэр номнуо айылҕаҕа сыыһа-халты сылдьыыттан, итиэннэ өртөөһүнтэн сылтаан бастакы улахан баһаардара таҕыстылар. Инспектордар уоту кытта сэрэхтээх буолары тоһоҕолоон этээлэр. Оттон маннык риэйдэлэр хас өрөбүл аайы ыытыллалар.