Ил Дархан Айсен Николаев Адаптивнай үөрэх комплексыгар сырытта

София Корякина 4-с кылаас үөрэнээччитэ. Кини былырыын Бүлүү улууһуттан көһөн кэлбитэ. Саҥа оскуолатын олус диэн сөбүлээбит. Биир сыл иһигэр элбэххэ үөрэннэ, сайынна. Араас олимпиадаларга, күрэхтэргэ кыттан элбэх ситиһилэрдээх.

София Корякина, Адаптивнай үөрэх комплексын үөрэнээччитэ: «Үөрэнэбит, бастакы уруокпут ааҕыы. Физкультураны сөбүлэтим, математиканы уонна салайааччыбын».

София Өрөспүүбүлүкэ күнүгэр Ил Дархан Айсен Николаевка быһа биэриигэ, эрийэн тиийэн бэйэтин боппуруоһун ыйыппыта. Адаптивнай үөрэх комплексыгар интернат тутуута бүтэн, хаһан үлэҕэ киирэрин. Бу боппуруос Ил Дархан тус хонтуруолугар турарын иһитиннэрдэ, билигин үлэ түһүмэхтиир түмүккэ тиийэн турар. Аны, саҥа үөрэх дьылыгар саҥа эбийиэк бэлэм буолуо диэн эрэннэрдэ. Софияҕа, үөрэҕэр ситиһиилэри баҕаран туран,  дьоҕурун өссө сайыннарарыгар хомус бэлэх уунна.

Адаптивнай үөрэх кыһата былырыын арыллыбыта. Дойду үрдүнэн соҕотох буолар.  Ил Дархан Айсен Николаев сылдьан, оҕолор үөрэхтэрин, ситиһиилэрин көрдө. Эбии тутуу хаамыытын билистэ.

Хас биирди анал хосторго оҕолору иистэнэргэ, уһанарга, туойунан оҥорорго уонна да өссө элбэх араас идэлэргэ үөрэтэллэр,  дьоҕурдарын сайыннараллар. Бу оскуолаҕа учууталлар, психологтар, логопеттар, дефектологтар бары биир ситимнээхтик үлэлииллэр.

Полина Петрова, Адаптивнай үөрэх комплексын дириэктэрин солбуйааччы: «Биһиги выпускниктарбыт салгыы үөрэххэ киирэллэригэр, үлэнэн хааччыллыылаах буолалларыгар университеты кытта сөбүлэҥ түһэрсибиппит, ол чэрчитинэн биһиги оҕолорбут үөрэххэ киирэллэригэр күүс-көмө буолаллар».

Оттон сыл бүтүүтэ адаптивнай үөрэх комплексыгар эбии 200 миэстэлээх оҕо уһуйаана уонна 150 миэстэлээх интернат үлэҕэ киирэрэ былааннанар. Маны таһынан, оҕолор сибиэһэй салгыҥҥа тахсан оонньууларыгар, сынньаналларыгар улахан оҕо былассаакката баар буолуоҕа. 

Фёдор Попов, бэдэрээччик: «Күүскэ үлэлээтибит. Көҕөрдүү үлэтэ хаалла. Бу күннэргэ саҕалыахпыт».

Күн бүгүн үөрэх кыһатыгар 463 оҕо үөрэнэр. Үөрэнээччилэр Арассыыйа таһымнаах бары күрэхтэргэ кытталлар, элбэх ситиһилэнэллэр. Оҕолор, оскуолаларын бүтэрдэхтэринэ баар туһааннаах үөрэх кыһаларыгар киирэн салгыы идэ баһылыырга үөрэнэр кыахтаахтар.