Быстах кэмнэ сүөһү хаайар пууннар 27 улууска тэриллэн билигин күрэтии үлэтэ барар

Саха сирин өрүстэригэр муус хамсааһына болҕомто киинигэр. Харыы тахсыан сөптөөх улуустарга быстах кэмҥэ сүөһүнү-сылгыны куоттарар сирдэр тэриллибиттэрэ. Нам улууһа сүөһүнү куттала суох сиргэ көһөрөргө бэлэм. Уопсайа 16 пуун, итиэннэ быйыл, эбии саҥа үрдүк сирдэри бэлэмнээн олороллор.

Владимир Макаров, Нам улууһун тыа хаһаайыстыбатын салаатын салайааччыта: «Билиҥҥи туругунан 16 пункт временного содержания диэн баар. Манна өрүс сүнньүгэр сытар нэһилиэктэрбитигэр оҥоһулуннулар».

Күн бүгүн Өрөспүүбүлүкэ үрдүнэн 27 улууска 185 сүөһүнү-сылгыны быстах кэмнэ тутар пуннар тэриллибиттэрэ. Манна тыа хаһаайыстыбатын үлэһиттэрэ сүөһү аһылыгын, оту, эбии аһылыгы хаһаанан олороллор. Уопсайа 18 тыһыынчатан тахса хороҕор муостааҕы уонна 14,5 тыһыынча сыспай сиэллэҕи куоттарарга бэлэм олороллор.

Сахаяна Павлова, СӨ тыа хаһаайыстыбатын миниистирин солбуйааччы: «Мииринэй куоракка Арыылаахха уу таһыма үрдүү турарын биһиэхэ манна туһааннаах тэрилтэлэр кэмигэр биллэрэллэр. Мииринэйгэ 128 сүөһү күрэтилиннэ үрдүк сиргэ».

Билигин Ленскэйгэ уу таһыма намтыыр. Өлүөхүмэ өрүһүн алын кырыыта Өлүөнэҕэ киирдэ. Троицкай сэлиэнньэтин аттынан муус хойуутук устар, уу таһыма намыһах. Көмүөл мууһа Хаҥалас, Дьокуускай, Нам диэкки ыам ыйын 17 күнүгэр кэлэрэ сабаҕаланар. Бүгүн, сарсын Покровскайга муус хамсааһына күүтүллэр.

Пётр Аргунов, Өлүөнэтээҕи уу салалтатын салайаччыта: «Намҥа кыра-кыралаан уу таһыма үрдүүр. Дьокуускайга ыам ыйын 17 күнүгэр буолар. Амма икки күн устата күүскэ уста сытар».

Көмүөл мууһа устар кэмигэр сэрэхтээх буоларга ыҥыраллар. Тустаах сулууспалар миэстэтигэр тиийэн хонтурол, дьуһуурустуба үлэтин ыыталлар. Быйыл, уопсайа 17 тыһыынча киһи сааскы халааҥҥа үлэлиэҕэ.