Быйылгыттан АГУИККИ эбии саҥа идэлэргэ үөрэтэр

Арктикатааҕы искусство, култуура уонна креативнай индустрия университетын устудьуона Иван Старостин иккис сылын артыыс идэтигэр уһуйулла сылдьар. Билигин үөрэхтэрин 4 семестрыгар Аан дойду литературатын классиктарын айымньыларын бара сылдьаллар.  Шекспир аатырбыт Ромео и Джульетта испиктээкилтэн быһа тардыы. Иван Ромео табаарыһын Меркуцио оруолун оонньуур.

Иван Старостин, университет 2 кууруһун устудьуона: «Манна үҥкүүлүүгүн, ыллыыгын, артыыстыыгын, киинэҕэ да уһуллуоххун сөп. Инникибэр творчество өөтүнэн син биир барарбын билэбин».

Былырыын ахсынньы ыйга үөрэх кыһата университет статуһун ылан ис хоһооно, хайысхата кэҥээн турар. Быйыл саҥа үөрэх дьылын көрсө университет 27 үөрэх бырагырааматын бэлэмнээн олорор. Онтон 13-һэ саҥа идэлэр. Мантан инньэ үөрэх кыһата аҥардас култуура эрэ буолбакка, искуственнай интеллект, медиаситим, киинэ, онтон да атын балысханнык сайдар салааларга исписэлиистэри бэлэмниир буолуоҕа.

Зоя Стрекаловская, үөрэх чааһыгар уонна цифровизацияҕа проректор: «Университет сыала креативнай экономиканы сайыннарыы уонна технологическай сайдыыга олус күүскэ үлэлэһэ сылдьабыт. Онно аналлаах үөрэх бырагыраамалара: геймдизайн, искусственный интеллект, арт-проектирование, продюсирование в креативных индустриях, художник мультипликационного фильма курдук билиҥҥи кэмҥэ олус тыҥааһыннах, наадалаах үөрэх бырагыраамалларын оҥордубут».

Үүнэр үөрэх дьылыгар бакалавиракка квотанан босхо 100-кэ миэстэ баар, ону тэҥэ эбии 200-тэн тахса төлөбүрдээх миэстэлэр бааллар. 

Дария Кириллина, киин туттарсар хамыыһыйа салайааччыта: «Медиакоммуникации диэн саҥа бырагыраамалаахпыт уонна региональное кинопроизводство диэн. Манна Сахабыт сирэ киинэ өттүгэр күүстээхпит диэн атын регионнартан кэтэһэбит».

Быйыл үрдүк үөрэххэ туттарсыыга кэккэ уларыйыылар киирдилэр. Итиэннэ орто анал үөрэх кэннэ үрдүккэ туттарсыы быраабылата эмиэ уларыйбыта. Ону тэҥэ оҕо музыкальнай, художественнай оскуоланы бүтэрбит буоллаҕына, эбии тус баалы ылар кыахтаныаҕа.

Татьяна Петрова, киин туттарсар хамыыһыйа эппиэттээх сэкэрэтээрэ: «Дополнительное образование будет давать дополнительные баллы. Тем более в сфере они уточнены в этом году именно в сфере искусства. То есть ребенок, который учился в музыкальной школе, может прийти и получить сразу до 10 баллов за индивидуальное достижение».

Университет бэйэтин тургутуутун үөрэххэ туттарсааччы эрдэ ылбыт идэтэ туттарсар үөрэҕэр сөп түбэһэр эрэ буоллаҕына туттарыан сөп, онтон сөп түбэспэт буоллаҕына биир кэлим эксээмэн түмүгүнэн киирэр, ону тэҥэ айар куонкуруһу эмиэ ааһар.