Саха сиригэр 24 тыһ киһи үлэнэн хааччыйыы бырайыагынан дьарыктаах буолла ааспыт сыл түмүгүнэн

Алмаас хостонуохтаах сирин чинчийии. Исписэлиис Сергей Ефимов сир үөһэ араҥатын кээмэйин суоттуур. Онуоха анаан анал приборунан көмөлөһүннэрэр. Киниэхэ барыта олус интэриэһинэй, тоҕо диэтэр бу идэни кини саҥа баһылаан эрэр. Сергей өрөспүүбүлүкэтээҕи үлэнэн хааччыйыы бырагырааманан бу сэдэх исписээлинэскэ үөрэммит. 

Сергей Ефимов, "Работающая Якутия. Кадры"  бырайыак кыттыылааҕа: «"Путевка в жизнь" диэн үчүгэй баҕайы бырагыраама баар эбит. Ону билэн баран Хаандыгатааҕы горно-геологическэй техникумҥа үөрэнним. Тэрилтэ үөрэтэр, барарга-кэлэргэ бырайыаһы төлүүр. Үөрэхпин бүтэрэн үһүс ыйбын үлэлии сылдьабын маркшейдерынан».

"Анаабыр Алмаастара" хампаанньаҕа "Путевка в жизнь" диэн бырагыраама Саха сиригэр үлэнэн хааччыйыыга туһуланар бөдөҥ "Работающая Якутия. Кадры" диэн бырайыак  иһинэн үлэлиир. Күн бүгүн 60 киһи үөрэҕи ааһан сир баайын хостооһуҥҥа үлэнэн хааччыллыбыт. Оттон 16 киһи үөрэнэ сылдьар. Манна сүрүннээн хайа инженерэ, механига, суол маастара, маркшейдер курдук идэлэри баһылыыллар.   

Бырайыак Ил Дархан Айсен Николаев дьадайыыны утары ыйааҕын чэрчитинэн үлэлиир. Манна сүрүннээн бырамыысыланнай хампаанньаларга үлэни биэрии уонна үлэҕэ наадыйыы көрдөрүүтэ үрдүк. Холобур, күн бүгүн бу эйгэҕэ 1000 вакансия баар.   

Анастасия Позднякова, СӨ нэһилиэнньэ дьарыктаах буолуутун Судаарыстыбаннай кэмитиэтин бэрэссэдээтэлин бастакы солбуйааччы: «25 сыл түмүгүнэн 24 тыһыынча киһи үлэҕэ киирдилэр бу бырайыак хампаанньаларыгар. Олор истэригэр олохтоох каадырдар 15 тыһыынча, 7,5 тыһыынчата эдэр ыччат уонна 6,5 тыһ. тыа сириттэн сылдьар дьон».

Дьарыктаах буолуу кэмитиэтигэр 3 сыл иһигэр 200 тэрилтэни кытта сөбүлэҥ түһэрсэн үлэнэн хааччыйыыны ситиһэр сорук турар. Маныаха быйыл үөрэҕи бүтэрээччилэри үлэ биэрээччини кытта көрсүһүннэриэхтэрэ. бу бырайыакка сонун уонна саҥаны киллэрии буолар. Оттон бу бырайыакка кыттан үөрэниэн, үлэлиэн баҕалаахтары дьарыктаах буолуу киинигэр билсэллэрин ыҥыраллар.