Ыксаллаах быһыы-майгы министиэристибэтэ өрүс туругун күннэтэ кэтээн көрүөхтэрэ

Сотору кэминэн сааскы халаан саҕаланан толору бэлэм буолуу ирдэнэр. Ыксаллаах быһыы-майгы министиэристибэтин 9 суһал бөлөҕө халааны ыытыыны  миэстэтигэр кэтиэҕэ. Кинилэр бары барыахтарын иннинэ бэлэмнэрин тургутан көрүү ыытыллар.  Спиридон Капитонов быыһыыр сулууспа аэромобильнай этэрээтин быыһааччыта. Ыам ыйын 5 күнүгэр кини этэрээтиттэн 4 буолан Амма улууһугар айанныахтара. Бэйэлэрин кытта наадалаах малы-салы, туттар тэриллэрин илдьэ бараллар.  

Спиридон Капитонов, СӨ быыһыыр сулууспа аэромобильнай этэрээтин быыһааччыта: «Бэйэбитин кытта туттар малларбытын, тыы мотуорун, массыына, БПЛА, спутниковай төлөпүөн уонна рациялары ылабыт».

Суол-иис баар сиригэр бу тиэхиньикэ барыта үлэлиэҕэ. Манна улахан кыамталаах тиэхиньикэлэри тэҥэ, сиринэн тыраанспар кыайан барабат түгэнигэр көтөр ааллары көхтөөхтүк туһаныахтара. Пилота суох аал өрүскэ буола турар балаһыанньаны тута суһаллык көрдөрөр, биллэрэр. Онон ыксаллаах быһыы-майгы буолар түгэнигэр быыһааччылар  эрдэттэн бэлэм буолуохтара. Өлүөнэ, Алдан, Амма, Таатта, Халыма, Дьааҥы, Индигиркэ өрүстэр устар нэһилиэнньэлээх пууннарыгар холбоһуктаах суһал бөлөхтөр үлэлиэхтэрэ.    

Семён Кугдаров, ЫБММ нэһилиэнньэ харыстабылын уонна гражданскай көмүскэлин хааччыйар салалта салайаччытын солбуйааччы: «Строевой смотрга хайдах бэлэмнээхтэрин быһаарыы буолуоҕа. Уонна ким хаһан хайдах айанныыр боппуруостарын быһаарыахпыт. Уопсай туругунан ыам ыйын 5 күнүгэр оперативнай бөлөхтөр айанныыллар үлэлиир оройуоннарыгар».

Бүгүҥҥү күҥҥэ Саха сирин өрүстэригэр харыы тахсыан сөптөөх учаастактарыгар мууһу хараардыы, эрбээһин үлэлэрэ толору ыытыллан тураллар. Иркутскай уобалас сиригэр муус устан саҕаланан эрэр, бу Саха сириттэн балтараа тыһыынча километрдаах сиргэ. Халааны бастакынан Ленскэй улууһа көрсөр.

Вячеслав Шехиров, Дьокуускайдааҕы гидрометеорология салалтатын салайааччытын солбуйааччы: «Первоначальный долгосрочный прогноз, выпущенный специалистами Гидрометцентра, говорит о том, что мы ожидаем 8 мая вскрытие на реке Лена у поселка Витим, но пока мы не будем пересматривать эти даты. Чем ближе будет продвижение ледохода, там уже будет более подробно выпущены краткосрочные прогнозы».

Быйыл халаан хайдах ааһарын кэллэҕинэ эрэ көрүөхпүт. Оттон туһааннах сулууспалар нэһилиэнньэҕэ куттал суох буолуутун хааччыйыыга толору бэлэмнэр.