Дьокуускайга хаарбах дьиэттэн көһөрүү салҕанар

Тутуу тигинэччи барар. Спортивнай түөлбэҕэ "Сири-уоту тэҥҥэ сайыннарыы" бырагырааманан бастакы элбэх этээстээх дьиэ тутуллар. Уруккута 17 кыбаарталга өр кэтэһиилээх көһөрүү онуттан хамсаан, күн бүгүн 8 дьиэ көтүрүллүбүт. Итиэннэ ол оннугар бу  тутуу барар. Маныаха 270 ыал саҥа кыбартыыра ылан көспүттэр.

Семён Потапов, Өрөспүүбүлүкэтээҕи ипотека агентствотын көһөрүүгэ салаатын салайааччы: «Бу дьиэлэри көһөрө сылдьабыт. 57 дьиэҕэ бүтэһик үс киһини кытта баттаһа сылдьабыт».

Спортивнай түөлбэни көһөрүүнү уонна саҥаттаан тутууну өрөспүүбүлүкэтээҕи ипотека агентствота ылсан ыытар. Бэдэрээттээх тэрилтэ этэринэн, 2033 сылга диэри сорук толору туолан, биир да мас дьиэ суох буолуохтаах. Онон олохтоохтор сүргэлэрэ көтөҕүллэн, көһөрүүнү күүтэллэр.

Карина Золорёва, "Спортивнай" түөлбэ олохтооҕо: «Переселение мы ждем давно. Нам постоянно говорят, что «скоро-скоро». В итоге последняя версия была то, что в этом году летом. Квартиры первого этажа уже нежилые, на втором четыре квартиры».

Бастакы уочаракка бу тутулла турар таас дьиэ эргин көтүрүү барыа. Олохтоохтору "Звезднай" диэн түөлбэҕэ көһөртүүллэр. Оттон сөбүлэспэт дьон харчынан ылаллар.

Көтүрүүгэ Якутская уулуссаттан Космонавтов уулусса быһа охсуһуутугар диэри турар дьиэлэр хабыллыахтара. Оттон инниктин Спортивнай түөлбэҕэ уопсайа 30 элбэх этээстээх таас дьиэ тутуллара былааҥҥа киирбит.

Саха сиригэр икки кэнники сылга муҥутуур элбэх иэн олоххо киирдэ. Ол курдук былырыын 800 тыһыынча кыбыдраатынай миэтэрэ тутулунна. Оттон көһөрүү бырагырааматын 2 түһүмэҕэ 90% туолла. бу туһунан Ил Дархан Айсен Николаев быһа ситимҥэ иһитиннэрдэ.

Айсен Николаев, СӨ Ил Дархана: «На сегодняшний день 16 домов еще не введены по первому этапу программы. На контроле стоит на моем и прокуратуры республики. Мы сделаем все, чтобы эта проблема была окончательно решена».

2017 сылга диэри хаарбаҕынан биллэриллэн баран баччааҥҥа диэри көһөрүллэ илик дьоҥҥо 3 хайысхалан дьиэлээһин барыа. Ол курдук харчынан толуйуу, иккис ырыынактан атыылаһан биэрии итиэннэ тутулла турар дьиэлэргэ кыбартыыралары атыылаһыы.