Дьокуускайдааҕы бырамыысылыннас техникумугар үөрэх бүтэһик түһүмэҕэ

Дьокуускайдааҕы бырамыысылыннас техникумугар үөрэх бүтэһик түһүмэҕэ. Аны аҕыйах ыйынан мантан, идэтийбит, бастыҥ каадырдар үүнэн тахсыахтара. Муома улууһуттан төрүттээх Ефрем Эверстов сварщик идэтин баһылаары сылдьар. Кини кыра сааһыттан аҕатын кытта тэҥнэ үлэлээн, сварщик идэтигэр үөрэнэргэ санаммыт.

Ефрем Эверстов, Т.Г. Десяткин аатынан Дьокуускайдааҕы промышленность техникум устудьуона: «Киһи күнү быһа сыбааркалаан эҥин арааска үөрэнэр эбит. Сатаабат кэмнэрбин сатаатым. Үс араастааҕын саҥа биллим».

Үөрэх кыһатыгар былырыын күһүн аныгы түөрт мастерской арыллыбыта. Онтон биирдэстэрэ бу сварщик идэтин баһылыыр устудьуоннар үөрэнэр саҥа сыахтара. Манна оҕолор үөрэнэллэригэр, дьоҕурдарын сайыннаралларыгар туох баар усулуобуйа барыта тэриллибит.

Ефрем Эверстов, Т.Г. Десяткин аатынан Дьокуускайдааҕы промышленность техникум устудьуона: «Бу электродунан буолбакка боробулуоханан сыбааркалыыр».

Устудьуоннар билиилэрин өссө ханаталларыгар, бу саҥа арыллыбыт кылаастар төһүү күүс буолаллар. Практика чааһа элбээн, оҕолор үөрэнэр, туттар ньымалара да элбээтэ.

Дьулустан Тимофеев, Т.Г. Десяткин аатынан Дьокуускайдааҕы промышленность техникум учуутала: «Бастатан туран үлэлииргэ үөрэтэбит. Сыбаарка араас көрүҥэр үөрэтэбит. Былырыын топ-1 идэ буолбута сыбаарка көрүҥэ Арассыыйа үрдүнэн. Оҕолор маны бүтэрэн номнуо үлэҕэ киирэллэр».

Техникум Өрөспүүбүлүкэҕэ биир бастыҥ идэтийбит үлэһиттэри бэлэмнээн таһаарар үөрэх кыһата буолар. Күн бүгүн техникумҥа 500-тэн тахса оҕо үөрэнэр. Манна устудьуоннары 10 идэҕэ үөрэтэллэр. Үлэнэн хааччыйыы үрдүкү көрдөрүүлээх. 

Айаал Докторов, Т.Г. Десяткин аатынан Дьокуускайдааҕы промышленность техникум дириэктэрэ: «Ил Дархан ыйааҕынан 2030 сылга дылы 75% дылы үрдэтиэхтээхпит. Ол туһугар күүстээх үлэни ытабыт».

Кэнники сылларга, оҕолор ордук 9 кылаас кэннэ оскуолаларын бүтэрэн, орто анал үөрэххэ туттарсан киирэллэрэ үксээтэ. Өрөспүүбүлүкэ салалтата, тустаах министиэристибэ колледжтарга, техникумнарга улахан болҕомто уурар. Саҥа, аныгы, толору хааччыллбыт кылаастар арылаллар,  саҥардыы, кэҥэтии үлэтэ ыытыллар.