Саха Өрөспүүбүлүкэтин күнүн киэн далааһыннаахтык бэлиэтээтибит

Суорун Омоллоон аатынан Опера уонна Балет тыйаатарын саалата толору. Бу бэлиэ күн, үгэс быһыытынан уоспсастыбаннас Саха Өрөспүүбүлүкэ күнүн бэлиэтэтэ. Биир сиргэ түмсэн инникилээх, кэскиллээх былааны түстээтэ. Ил Дархан Айсен Николаев кэлбит ыалдьыттары, Саха сирин олохтоохторун Өрөспүүбүлүкэ күнүнэн эҕэрдэлээтэ.

104 сыл аннараа өттүгэр саха норуотун чулуу уолаттара Саха сирэ автономия буоларын ситиспиттэрэ. Бу бэлиэ күн Өрөспүүбүлүкэ инники дьылҕатын быһаарбыт, сайдар тосхолун түстээбит, историяҕа киирбит күнүнэн буолар.

Евгений Григорьев, Дьокуускай куорат баһылыга: «Биһиги омукпут үөрэҕириигэ күүскэ барар. Биһиги улуу убайдарбытыгар муҥура суох махтанабыт. Бу күҥҥэ өссө махтал тылбытын тириэрдэбит Михаил Ефимович Николаевка. Кини өҥөтүнэн 1992 сыллаахха Конституциябыт киирэн турар».

Бүгүҥҥү күҥҥэ Өрөспүүбүлүкэ регион быһыытынан бары хайысхаҕа ситиһиилээх, киэн эйгэлээх. Бэйэтин бас билэн инники кэскилгэ, сайдыыга киэнник хардылыыр Дойдуга биир бастыҥ регионунан буолар.

Сергей Местников, СӨ бырабыытылыстыба бэрэссэдээтилн солбуйааччы: «Үөрэхтээһин, наука, бырамыысылыннас, тыа хаһаайыстыба эйгэлэр сайдыыларыгар, литература, саха тыла курдук хайысхаларга биһиги билигин үлэбитин өссө күүстээхтик ыытыахтаахпыт».

Мунньахха Өрөспүүбүлүкэ салалтата, дьокутааттар, уопсастыбаннас, бэтэрээннэр, анал байыаннай дьайыы кыттыылаахтара уонна эдэр ыччат көхтөөх кыттыыны ылла.

Кырдьык да, кэлэр кэнчээри ыччакка, инники көлүөнэҕэ историябытын, төрүт үгэспитин тириэрдэр соруктаахпыт. Ону ыччат өйдүүр, махтана саныыр. Үрдүкү сыанаттан Анжелика Эверстова эдэр дьоҥҥо туһаайан, туохтан да толлубакка, айан-тутан, үлэлээн,  Дойдугутун таптаан,  бэриниилээх буолун диэн ыҥырда.

Күн бүгүн Саха сирэ мөлүйүөнтэн тахса нэһилиэнньэлээх. Регион Дойду президиэнэ ыытар соруктарын олоххо киллэрэр, саҥа рекордары олохтуур. Уһун үйэлэнии, социальнай гаастааһын, олоҕу-дьаһаҕы тупсарыы, дьадаҥы олоҕу аччатыы уонна да атын өрүттэргэ. Өрөспүүбүлүкэ күн бүгүҥҥү социальнай-экономическай туруга регион сайдан иһэрин туоһута.