"Анаабыр алмаастара" тэрилтэҕэ идэҕэ сатабылы тургутуу күрэҕэ ыытылынна
Идэҕэ сатабылы тургутуу. Бу курдук баараҕай тиэхиньикэни уһулуччу таһымҥа баһыйа тутуу дьиҥнээх холобурун көрөбүт. "Идэтигэр бастыҥ" диэн күрэх биир быһаарыылаах түһүмэҕэ. Экскаваторы ыытааччы хайысхатыгар уопсайа 3 түһүмэх баар. Балартан саамай сүрүннэрэ испиискэ хоруопкатын охторбокко эрэ сабыы. Уустук сорудаҕы уопуттаах үлэһит Егор Богатырёв холкутук толордо.
Егор Богатырёв, "Анаабыр алмаастара" АУо экскаватор суоппара: "Күрэххэ бастакыбын кытынным, интэриэһинэй эбит. Эрдэ истэр этим уолаттар кытталларын, быйыл кэлэн бэйэбин холонон көрдүм".
"Анаабыр алмаастарын" бириискэлэригэр "Идэтигэр бастыҥ" диэн күрэх сыллата ыытыллар. Манна сир баайын хостуурга туттуллар улахан тиэхиньикэни салайыыга бастыҥтан бастыҥы быһаараллар. Ол курдук экскаватор машинист, "С" категориялаах суоппар, сварщик уонна электрик диэн хайысхаларга күрэхтэһэллэр.
Сварка бириискэҕэ сүрүн суолталаах. Тиэхиньикэ кээһэннэ эрэр кинилэр илиилэригэр киирэр. Онон манна түргэн-тарҕан туттууну сэргэ мындыр өй ирдэнэр. Күрэххэ кыттааччылар эмиэ уустуктан уустук сорудахтары толороллор.
Борис Нутчин, "Анаабыр алмаастара" АУо сварщига: "Биһиги үлэбит сыах иһигэр. Сыахпыт үчүгэй сылаас, үлэбит элбэх. Биһиэнэ барыта ыарахан кыамталаах тиэхиньикэни чөлүгэр түһэрии".
Идэҕэ бастыҥнары быһаарыы күрэҕэ сайыҥҥы күүстээх үлэ иннинэ ыытыллар. Кыс устата хайа боруодатын биир сиргэ таһаллар. Итиэннэ сайыҥҥы өттүгэр сууйаллар. Онон сир баайын хостооһуҥҥа ити кэм саамай суолталаах. Билигин сүрүн күүһү күндү тааһы сууйар фабрикалары таҥарга, сороххо саҥаттаан тутууга уураллар. Уопсайа барыта 14 фабрика "Маят" бириискэҕэ быйыл сайын үлэлиэ.
Сергей Герасимов, "Анаабыр алмаастара" АУо "Үөһээ Эбэлээх" наардыыр учаастагын аҕа маастара: "Көрөргүт курдук оборуудабанньаны өрөмүөннүү сылдьаллар. Технологическай сыбаайаларбыт бэлэм буоллахтарына оборуудабанньаларбытын ол үрдүгэр туруоран, фабрикаларбытын, наардыыр тэриллэрбитин хомуйан барабыт".
Күрэх кэмигэр идэҕэ уһулуччу сатабыллаахтарын улахан массыына суоппардара көрдөрдүлэр. Кинилэр анал былаһааккаҕа араас сорудахтары толордулар. Бары да улахан уопуттаах буоланнар күрэх тыҥааһыннаахтык ааста. Оттон үгүс күрэхтэһээччини электрика хайысхата түмтэ. Кинилэр двигатель таҥаннар маастарыстыбаларын көрдөрдүлэр.
Юрий Лимонов, "Анаабыр алмаастара" АУо электрик-силиэсэрэ: "Хас биирдии күрэх кыттааччыта анал истиэндэҕэ двигатель таҥныбыт".
"Идэтигэр бастыҥ" күрэххэ сүүмэрдэммит кыттааччылар салгыы АЛРОСА-ҕа кытта бараллар. сыллата ыытыллар күрэх исписэлиистэр сатабылларын үрдэтиигэ, үлэһит көҕүн көтөҕүүгэ уонна идэни өрө тутууга туһуланар.