Бу саас дьону таһыыга 30 салгын олобохтоох суудуна сылдьыа
Муус устар 15 күнүттэн саамай сүрүн Дьокуускай-Аллараа Бэстээх хайысханан өрүс суола сабылынна. Айаны-сырыыны киэһэ өттүгэр бобон, күнүскү кэмҥэ массыыналар көхтөөхтүк айанныыллар. Суол салалтатын үлэһиттэрэ, ГИМС иниспиэктэрдэрэ дьоҥҥо-сэргэҕэ өйдөтүү, сэрэтии үлэтин ыыталлар. Сылын ахсын муус устар ортото мууһунан сырыы Саха сирин үрдүнэн тохтуур.
Гаврил Фёдоров, "Бүлүү" суол салалтатын салайааччытын солбуйааччы: "Суол алдьанна уонна бортуокаларынан муус үрдүнэн уу таҕыста. Ол иһин сабарга быһаарыныы ыллыбыт".
Сыыйа нэдиэлэ устата кэккэ өрүстэргэ үлэлиии турбут туорааһыннар утуу-субуу сабылыннылар. Муус устар 17 күнүттэн хаалбыт муус суолларыгар айан-сырыы бобулунна. Ол курдук Хатас-Павловскай хайысха бээтинсэттэн саҕалаан үлэтэ эмиэ тохтоото. Маныаха ГИМС инсипиэктэрдэрэ сааскы муус кутталлааҕын, киһи олоҕун курдук кэбирэҕин санаталлар.
Татьяна Степанова, ЫБММ СӨ салалтатын уу эбийиэктэригэр куттал суох буолуутугар салаатын салайааччытын солбуйааччы: "Холбоһуктаах рейдэлэр күүһүрэн биэрэллэр. Суол сабыллыбытын кэннэ мууска тахсар булгуччу бобуллар. Суоппардар, административнай эппиэтинэскэ тардылларгытын умнумаҥ".
Өрүһүнэн суол-иис сабыллан, хивустар сезоннара саҕаланна. Чэппиэр күнтэн тимир суол пассажирдарын тиэйэр "Ленатранс" тэрилтэ дьону нөҥүө кытылга тиксэрэр. Айан 204-с түөлбэттэн Мэҥэ Хаҥалас улууһун Аллараа Бэстээҕэр диэри уона төптөрү хайысханнан тардыллар.
Сергей Кривошапкин, СӨ транспоры салайыы департаменын салайааччытын солбуйааччы: "бастакы күҥҥэ 8 салгын сыттыктаах суудуна таҕыста. Уопсайынан бу сааскы хаайтарыы кэмигэр 30 суудуна үлэҕэ тахсыаҕа".
Суудуна ахсаана эбиллэн, дьон улахан көһүтүүтэ суох айанныаҕа. Ааспыт сыл күһүнүттэн манна "Намыв" диэн саҥа ыстаансыйа үлэҕэ киирбитэ. Дьон аайаннырыгар табыгастаах буоллун диэн эбийиэк киирэр-тахсар суолунан-ииһинэн, наадалаах инфраструктуранан хааччыллан турар.
«Дьону таһыы сарсыарда 7 чаастан киэһэ 19 чааска диэри ыытыллыаҕа. Айан бэрээдэгэ дьон туолуутунан оҥоһуллуоҕа. Сыана ааспыт сылынан хаалла, ол курдук 2500 солкуобайы төлөөн анараа кытылы булаҕын», - Татьяна Николаева, корреспондент.
"Ленатранс" тэрилтэ быйылгы сылга 2 саҥа суудунаны үлэҕэ таһаарда. Биирэ таһаҕас тиэйэр, биирэ дьону таһар. Саҥа суудуна Красноярскайга оҥоһуллубут, манна 13 киһи батар. Дьон табыгастаахтык айанныырыгар туһунан киэҥ сымнаҕас олорор сир көрүллэр.