Дьокуускай куоракка Уһук илиҥҥи таһымнаах остуол тениһыгар курэх саҕаланна

Бу нэдиэлэ 5 күннээх күүрүүлээх күрэҕэ Кыайыы 50 сыла спорт дыбарыаһыгар тэрилиннэ. Дьокуускайга бүтүн Уһук Илиҥҥи уокурук араас регионуттан 14 саастарыгар диэри оҕолор мустан, остуол тенниһигэр бастыыр иһин киирсэллэр. Күрэххэ барыта 9 хамаанда кыайыыны былдьаһар. Сүрүн болҕомто Бурятия хамаандатыгар ууруллар. Кинилэр саамай күүстээх спортсменнарын аҕаллылар.

Михаил Платонов, күрэх бас судьуйата: «Успуорт бырааһынньыга буоллаҕа. Бары бэйэ бэйэлэрин кытта билсэллэр, көрсөллөр. Ким хайдах таһымнаах эбитий диэн. Холобур, Бурятия күүстээх хамаандатын аҕалбыт. Кинилэр Уһук Илиҥҥэ эрэ буолбакка улахан күрэхтэһиилэргэ кытталлар. Хайдах буоларын күрэхтэһии түмүгэ көрдөрүө».

Саха сирин чиэһин уолаттар, кыргыттар да хамаандалара тэҥинэн көмүскүүргэ бэлэмнэр. Кыргыттарга быйыл анаан-минээн ураты усулуобуйа оҥоһуллубут. Кинилэр бэлэмнэниилэрэ эрдэттэн, былааннаахтык барда. Кыргыттар тренердэрэ Василий Румянцев уопсайа хамаандаҕа 5 кыыс баар, олортон саамай күүстээхтэри талан ылан дьарыктаатыбыт диэн эттэ.

Василий Румянцев, Саха сирин кыргыттар хамаандаларын тренера: «Бу иннинэ лидербытын Кривошапкина Даринаны куоракка аҕалан күҥҥэ иккитэ дьарыктаан. Чолбон успуорт оскуолатыгар. Кыайыаххпыт диэн эрэнэбит».

Кыргыттарга улахан эппиэтинэс сүктэрилиннэ. Кинилэр күрэхтэһиигэ бастакы хардыыны оҥорор чиэстэннилэр. Эдэр спортсменнар күрэхтэрин түмүгэ киирсии уопсай түмүгэр улахан суолталаах буолуоҕа. Мантан антах, кыргыттар кэннэ, аны уолаттар уонна иккиэ буолан оонньооһун барыаҕа. Остуол тенниһигэр 109 спортсмен соҕотохтуу, иккиэ буолан, буккаас уонна хамаанданан көрүҥнэргэ кыттыахтара.

Дойду таһымнаах улахан күрэх ыам ыйыгар Чебоксар куоракка ыытыллыаҕа. Оттон Уһук илиннээҕи күрэххэ уопсайа 72 мэтээл оонньонор. 18тыы кыһыл, үрүҥ көмүс уонна 36 боруонса.