Ытык кырдьаҕаска Роза Петровна Поповаҕа "Үйэ саас" бочуоттаах бэлиэни туттарыыта буолла

100 сааһын томточчу туолбут Роза Петровна Попованы хос сиэттэрэ арыаллаан дыбарыас саалатыгар киллэрэллэр. Роза Петровна 3 кыыстаах, 5 сиэннээх, 5 хос сиэннээх. Төһө даҕаны биир үйэ саастаннар ытык кырдьаҕас чэгиэн, тэтиэнэх сылдьар, орто кыыһыгар олорор.

Людмила Габышева, Роза Петровна кыыһа: «Үчүгэйдик сылдьар, бэйэтин көрүнэн, барытын өйдүүр, билэр».

Өлүөхүмэ улууһун 2-с Нөөрүктээйи нэһилиэгиттэн төрүттээх ытык кырдьаҕас 8 кылаастаах оскуоланы бүтэрэригэр Аҕа дойду сэриитэ саҕаламмыта. Аҕата Петр Дмитриевич колхуос бэрэссэдээтэлэ 1943 сыллаахха сэрии толоонугар охтубута. Сэрии кэмигэр Роза Петровна педучилищеҕа киирэн салгыы физмат факультекка  үөрэнэн учуутал идэтин баһылаабыта.

Роза Петровнаны 100 саастаах өрөгөйдөөх үбүлүөйүнэн эҕэрдэлии үлэ уонна социальнай сайдыы министиэристибэтиттэн, Дьокуускай куорат дьаһалтатыттан, төрөөбүт Өлүөхүмэ улууһуттан кэллилэр. "Үйэ саас" бочуоттаах бэлиэни миниистир Елена Волкова туттарда.

Айталина Васильева, Дьокуускай куорат нэһилиэнньэтин социальнай харалтаҕа салалтатын салайааччытын солбуйааччы: «Биһиэхэ уопсайа өрөспүүбүлүкэҕэ 21 киһи 100 сааһын томточчу туолан биһи кэккэбитигэр сылдьаллар. Биһиги Ил Дархан аатыттан 1 000 000 солк. кинилэргэ тириэрдэбит».

Роза Петровна 20-тэн тахса сыл математика учууталынан, улуус үөрэҕириитин инспиэктэринэн, райисполком бэрэссэдээтэлин солбуйааччытынан ситиһиилээхтик үлэлээбитэ. Ытык кырдьаҕас төрөөбүт Сахам сирэ сайдарыгар баҕарабын диэн алгыс тылын этэр.

Роза Попова, ытык кырдьаҕас, СӨ үөрэҕирии систиэмэтин бочуоттаах бэтэрээнэ: «Сахалар, өрөспүүбүлүкэбит туһунан улаханнык толкуйдуубун. Арассыыйаны букатын хаппапын. Биһи Сахабыт сирэ сайдарын, баай буоларын уонна дьон үлэһит, үөрүүлээх-көтүүлээх буолалларын баҕарабын».

Ытык кырдьаҕаска мустубут дьон эҕэрдэ бастыҥын эттилэр, өйдөбүнньүк бэлиэлэри тутардылар, киниттэн алгыһын ыллылар. Бу олоххо саамай үрдүк дьолунан чугас дьонун тапталыгар, өйөбүлүгэр уйдаран өр сылларга этэҥҥэ сылдьан уһун үйэлэнии буолар.