Төрүт дьарыгы идэ оҥостуу

Уус оһоҕо умайан кытыастар. Олохтоох тиит мас көмөрө суостаах буолан тимир тута кытарар. Саха сирин ааттаах-суоллаах тимир ууһа Роман Готовцев билиитин, сатабылын уһуйааччытыгар тириэрдэр. Ыччаты үөрэтиигэ уһун сылларга үлэлиир Мындыр Уус төрүт ньыманы эрэ буолбакка олох хардыытынан саҥаттан саҥаны  тобулар.

Хомус оҥоруута олус уустук, ылбычча киһи ылсыбат. Манна хас биирдии хамсаныы хомус тыаһыгар суолталаах. Онон ымпыга-чымпыга үгүс. Оттон эдэр кэскиллээх уус Спиридон Иванов дьаныһан туран 8 сылын Роман Готовцевка уһуйуллар.

Спиридон Иванов, "Айар Уустар" колледж иһинэн тимир ууһун кууруһун үөрэнээччитэ: «Хас биирдии дьиэҕэ хайаан да баар буоллар диэн өйдөбүл баар. Билигин өссө сайыннаран хомусчуттар ирдэбиллэрэ элбээн иһэр. Ол иһин оҥорооччу эмиэ билиитэ тупсан иһэр, оҥоруута сайдан иһэр».

"Айар уустар" колледж иһинэн тимир ууһун кууруһугар өрөспүүбүлүкэ араас муннуктарыттан үөрэнэллэр. Альберт Захаров Томпо улууһуттан анаан-минээн уһуйулла кэлбит. Кини өбүгэ үгэһин дьарыктаах буолууну кытта дьүөрэлиир.

Альберт Захаров, "Айар Уустар" колледж иһинэн тимир ууһун кууруһун үөрэнээччитэ: «Бэйэм Роман Ильичка кэлэн үөрэммитим ыраатта, хомуска, быһахха. Барытыгар үөрэнэ сылдьабын. Билиҥҥи кэмҥэ докумуона суох туох да киһи буолбатаххын. Ол иһин бу үөрэх бэйэр идэ оҥостор буоллахха наадалаах».

Онон бу дьоҕус уус кыһатыгар сыллата уонунан тимир ууһа буһан-хатан тахсар. Манна сүрүн сорук төрүт дьарыгы ыччакка тарҕатыы, идэлээх буолуутугар көмөлөһүү.

Роман Готовцев, Мындыр Уус - "Айар Уустар" колледж преподавателя, СӨ тимир уустарын сойууһун бэрэссэдээтэлэ: «Бэйэбит култуурабыт буолар. Уһаарыыттан саҕалаан быһахпытыгар киирэн, хомуспутугар киирэн маннык салҕанан бара туруоҕа диэн бигэ эрэллээхпин. Биэнсийэҕэ тахсан баран дьарык оҥостор баҕалаах киһи элбэх. Үөрэххэ киирэннэр, докумуоннарын туттараннар биһиэхэ үөрэнэллэр».

Тимир ууһун кууруһа хомус уонна быһах оҥоруута диэн арасхан ыытыллар. Манна үөрэнии болдьоҕо 4-6 ыйга диэри. Сааһыттан тутулуга суох.