Доруобуйа эйгэтигэр саҥа ньыма

Бу пилота суох көтөр аал мантан ыла доруобуйа харыстабылын эйгэтигэр үлэлиир дьоҥҥо, быраастарга көмө буолуоҕа. Кини эми-тому уонна биоматериаллары таһыаҕа. Түргэн, тарҕан, 10 киилэҕэ диэри ыйааһыны кыайар, суола-ииһэ суох сиргэ кини көмөтө улахан суолталаах буолуоҕа.

Аан бастакынан бу сиринэн салайыллар аппарат Өктөм амбулаториятыттан Покровскай куораттааҕы киин балыыһаҕа диэри көттө. Уопсай бириэмэтэ 20 мүнүүтэни кыайбат. Бу медиссинэ эйгэтигэр саҥа сүүрээн, улахан суолталаах бырайыак буолар.

Николай Степанов, Хаҥалас улууһун баһылыгын солбуйааччыта: «Покровскай куоракка дылы 30 км курдук көтөн пациеннар хааннарын илтилэр. Оройуон киин балыаһатыгар тиийэн түстэ. Бырайыакка үлэлэспит дьоҥҥо махтанабыт».

МедБПЛА инновационнай бырайыак Саха сирин килимэтин учуоттаан оҥоһуллубут. Быраастар үлэлэрин тупсарыа, түргэтэтиэ. Диагназ туруорар кэмин кылгатыаҕа диэн быраастар этэллэр, үөрүүлэрин үллэстэллэр.

Артур Протодьяконов, Хаҥалас улууһун киин балыыһатын кылаабынай бырааһа: «Үөрүүлэх күн буолла, улахан историческэй бырайыак үлэҕэ киирдэ. Кэлин бу бырайыак үчүгэйдик үлэлиирин баҕарабыт».

Саҥа хамсааһын былаана киэҥ. Инникитин маннык сиринэн салайыллар аппарат хас улуус балыыһатын аайы баар буолуоҕа. Нам улууһун киин балыыһата бу бырайыагы туһанарга толору бэлэм. Медиссиинэ эйгэтин сайдарыгар төһүү күүс буолуоҕа диэн эрэллээхтэр.

Ариян Сергеев, Нам улууһун киин балыыһатын кылаабынай бырааһа: «Нам улууһа Өлүөнэ биэрэгэр турар. Нөҥүө хас да нэһилиэктэрдээхпит. Бу саҥа доруобуйа харыстабылыгар ньыма туһалыа дии саныыбын».

Пилота суох көтөр аалы көтүтүү, бары хайысхаҕа туһаныы дойду Президиэнэ Владимир Путин көҕүлээһининэн "Беспилотнай көтөр системалар" национальнай бырайыак чэрчитинэн ыытыллар.