Саха сирин өрүстэригэр уйугу намтаттылар
Дьокуускай-Аллараа Бэстээх хайысха суола. Кыра да улахан да тиэхиньикэ тиһигин быспакка айанныыр. Сэрэдэттэн саҕалаан манна 30 туоннаттан 20 туоннаҕа диэри уйук ыйааһынын аччаттылар. Тустаах бэлиэни суол салалтатын үлэһиттэрэ туруордулар. Маныаха өрүһүнэн сырыы куттала суох итиэннэ муус суолун туруга этэҥҥэ буоларыгар олохтоммут ыйааһынтан ыарахан тиэхиньикэлээхтэр айаннаабаттарыгар ыҥыраллар.
Гаврил Фёдоров, "Бүлүү" суол салалтатын суолу көрүү-истии салаатын салайааччытын солбуйааччы: "Билигин муус суол дэлби уу буолла. Итиэннэ өрүскэ киирии суоллар алдьаннылар. Онон кыра массыыналарга кутталланна. Ити алдьаныы суолга куттал суох буолуутугар дьайар, ол иһин уйугу кыччатабыт".
Уларыйыы киирбитинэн ыксаллаах быһыы-майгы министиэристибэтин Саха сиринээҕи салаатын уу эбийиэктэригэр куттала суох буолууну хааччыйар салаа иниспиэктэрдэрэ суоппардарга өйдөтүү үлэтин ыыталлар. Ол курдук "Куттала суох муус" ыйынньык чэрчитинэн бу кэмҥэ бэрэбиэркэ үлэтин күүһүрдэллэр, өрүстэргэ рейдэлэри ыыталлар.
Татьяна Степанова, ЫБМ СӨ салалтатын уу эбийиэктэригэр куттала суох буолууну хааччыйар салаа салайааччытын солбуйааччы: "Сааскы муус киһи олоҕор улахан кутталы үөскэтэр. Сыл аайы муус анныгар киһи, тиэхиньикэ түһэрэ баар суол. Онон суоппардарга көҥүллээх уйугу тутуһуҥ диэн".
Муус устар ыйга салгын температурата орто көрдөрүүттэн үрдүк буолара күүтүллэр. Күнүскү өттүгэр күүскэ ириэрэр. Онон быйыл Саха сирин өрүстэрэ 2 күн эрдэ усталларын гидрологтар билгэлииллэр.
Алёна Лавернова, гидрометеосулууспа сүрүннүүр гидролога: "бүлүү, Алдан, Амма өрүстэргэ муус 1-2 күн эрдэ устуоҕа. Оттон Өлүөнэ Ленскэй, Өлүөхүмэ уонна киин улуустарга кэмигэр уонна эрдэ устуо диэн билгэлиибит".
Хааччахтааһын киирбитин кэннэ, кеҥүллэммэт уйуктаах тиэхиньикэ мууска тахсар түгэнигэр хаһаайын административнай эппиэтинэскэ тардыллар. Хас биирдии ыытааччы суол бэлиэлэрин учуоттуура, суол быраабылатын тутуһара хайаан да ирдэнэр.
"Бу Дьокуускай-Аллараа Бэстээх хайысханан сырыы үгэнэ. Оттон өрүһүнэн сырыы тохтуура ый курдук хаалла. Муус устар 15 күнүгэр муус суоллар киин улуустарга сабыллыахтара. Оттон хоту уонна Арктика улуустарыгар бу ый 20-24 күннэригэр күн-дьыл туругуттан көрөн сабыллыа", - Татьяна Николаева, корреспондент.