Ил Дархан бирииһигэр олоҥхону толоруу күрэҕэ

Арчы дьиэтигэр олоҥхо түһүлгэтэ тэриллиннэ. Аан бастакытын төрүт үгэскэ олоҕуран олоҥхону толорууга Ил Дархан бирииһигэр күрэс саҕаланна.  Олоҥхону толоруу күрэҕэр өрөспүүбүлүкэ бары улуустарыттан кэллилэр, барыта 37 олоҥхоһут.

Сергей Местников, СӨ Бырабыыталыстыба бэрэссэдээтэлин солбуйааччы: “Кинилэри үгэс  хааччаҕа суох толороллорну ситиһэр сыаллаах күрэх. Үһүс түһүмэххэ 8 чаастан итэҕэһэ суох толоруохтара. Бу маннык күрэх олоҥхону сайыннарыыга сүҥкэн суолталаах буолара саарбаҕа суох”.

Саха төрүт үгэһин байытар дьон үгүс, эдэр ыччат тиийэ кытта кэлбит. Бүлүү улууһуттан сылдьар олоҥхону аргыс оҥостубут эбээлээх сиэн Маргарита Григорьева уонна Саина Шамаева бу күрэскэ бэйэлэрин холонон көрөргө санаммыттар.

Маргарита Григорьева, кыттааччы: “Мин бэйэм суруйбут олоҥхолоохпун. Итини сэргэ “Үрүмэччи” бөлөҕү иитэн таһаардым”.

Сайыына Шамаева, кыттааччы: “Олоҥхолуу сылдьарбар эбэбэр махтанабын. Оттон удьуорбутун эттэххэ, хос эһэм тойуксут эбит”.

Олоҥхону толорууга күрэх бүгүн иккис күнэ,  ким иккис түһүмэххэ киирэрэ биллиэҕэ. Аныгыскы түһүмэххэ киирбиттэр күрэхтэрин ыам ыйыгар салҕыахтара. Ол кэннэ түмүктүүр түһүмэх сэтинньи ыйга буолуоҕа. Манна 3 кыайыылаах бастыҥ олоҥхоһут аатын аатыахтара.

Иван Иванов, Өрөспүүбүлүкэтээҕи норуот айымньытын дьиэтин дириэктэрэ: “муҥутуур кыайыылаах Ил Дархан аатыттан 500  тыһыынча солкуобайы тутуоҕа. Иккис миэстэ 200 тыһыынча солкуобайы, оттон үһүс миэстэ 100 тыһыынчанан наҕараадаланыахтара”.

Олоҥхону үгэс быһыытынан толоруу күрэҕин дьүллүүр сүбэтэ 10 киһиттэн турар. Манна өрөспүүбүлүкэҕэ олоҥхону тарҕатыыга, сайыннарыыга үлэлэспит, сүҥкэн кылааты киллэрбит дьон киирдэ. Онон күрэс үрдүк таһымнаах ыытыллара күүтүллэр.

Афанасий Ноев, СӨ култуура уонна духуобунай култуура миниистирэ: “Мантан тэптэрэн эдэр олоҥхоһуттарбыт үөрэниэхтэрэ. Дьоммут-сэргэбит сэргиэхтэрэ. Оччоҕо биһиги тылбыт-өспүт, итэҕэлбит сайдыа. Бу Кулутура уонна Норуоттар сомоҕолоһууларын сылыгар бу саҥа күрэхпит өссө далааһыннаах буолуоҕа”.

Бүгүн күрэс бастакы түһүмэҕин түмүктүүр күнэ. Олоҥхону сүгүрүйээччилэри, олохтоохтору уонна ыалдьыттары Арчы дьиэтигэр кэлэн олоҥхону истэргитигэр ыҥыраллар.