Саха сирин тыа хаһаайыстыбаларыгар бүтэһик түөрт сылга 200-тэн тахса тыраахтыр бэрилиннэ

Тыа хаһаайыстыбатын сайыннарааччылары тиэхиньикэннэн хааччыйыы. Бу сытыы боппуруос тула кэпсэтии барар. Ыһыыны уонна окко киириини баттаһа былааннаммыт көлөнү тириэрдиини, үгүс сылларга тиэхиньикэни аҕалыыга үлэлэһэн кэлбит Руслан Федотов туруорсар. Маныаха кэпсэтии Минскэйдээҕи тыраахтар собуотун Арассыыйаҕа бэрэстэбиитэлэ Владимир Петухов кэлиитин кытта тоҕоостоох.

Руслан Федотов, "ТД МТЗ-Сибирь" тэрилтэ Саха сиригэр бэрэстэбиитэлэ: «Тыа дьонугар билигин тиэхиньикэ наада. Сайылык, от кэмэ саҕалана илигинэ тиэхиньикэ дьоҥҥо тиийиэн наада».

"Ынах сүөһү эбии аһылыгын оҥорон таһаарыыны сайыннарыы" диэн бырагырааманан хаһаайыстыбаларга министиэристибэ өттүттэн тыраахтар төлөбүрүн толуйууга көмө барар. Ол курдук сыллата 150-200 мөлүйүөн өрөспүүбүлүкэ бюджетыттан көрүллэр. Бүтэһик түөрт сылга 200 тахса МТЗ тыраахтар хаһаайыстыбаларга бэрилиннэ.  

Александр Атласов, Ил Түмэн тыа сиригэр уонна аграрнай политикаҕа сис кэмитиэтин бэрэссэдээтэлэ: «Биһиги өрөспүүбүлүкэбитигэр саамай улахан тиэхиньикэнэн хааччыйар тэрилтэ ИП Федотов буолар».

Быйылгы сорук эмиэ улахан. Инники сылларга курдук Минскэй собуотугар оҥоһуллубут 100 тыраахтар кэлиэҕэ. Маны барытын биир тэрилтэ иилиирэ-саҕалыыра көмөнү ылааччыга барыстаах. Сүрүнэ тириэрдии  болдьоҕун, төлөбүрү аахсыы өттүттэн.

Руслан Федотов, "ТД МТЗ-Сибирь" тэрилтэ Саха сиригэр бэрэстэбиитэлэ: «Быйылгы бырагыраамаҕа эбии дуогабар оҥостуохпут тыраахтыр собуотун кытары. Өрүс суола сабылла илигинэ тириэрдэ сатыахпыт».

Онон былаас уонна бизнес ыкса сөпкө үлэлэһиитин түмүгэр быйыл хаһаайыстыбалаахтар тиэхиньикэни кэмигэр тутуохтара. Онон тыраахтар собуотун бэрэстэбиитэлэрэ Саха сиригэр маҥнайгы сырыыта бэрт таһаарыылахтык ааста. 

Владимир Петухов, "ТД МТЗ-Сибирь" тэрилтэ генеральнай дириэктэрэ: «Посмотреть, чем живет республика, какую помощь можем предложить, как Минский тракторный завод».

Итини сэргэ икки өттүттэн барыстаах кэпсэтии түмүгэр инники 3 сылга бииргэ үлэлэһии былаанын торумнаалытар. Бу биллэн турар,  тыа хаһаайыстыбатын сайдыытыгар уонна көмөнү тириэрдии көдьүүстээх буолуутугар олук буолар.