Кыһыҥҥы суолу баттаһа хотугу тиэйии салҕанар
Бу курдук хоту уонна Арктика улуустарыгар социальнай суолталаах бородуукталары тиэйии тэтимнээхтик барар турар. Сүрүн сорук - кыһыҥҥы суол сабыллыан иннинэ, былааны толоруу. Хас биирди күн былдьаһыктаах. Күнтэн күн кыһыҥҥы суолларынан айан туруга мөлтүүр.
Бу бородууктанан толору тиэллибит улахан массыына Дьааҥыга, Зырянкаҕа, Черскэйкэ уонна Тиксигэ айаннаата. Уопсайа 2 тыһыынча кэриҥэ туонна таһаҕаһы хоту оройуоннарга тиэрдиэхтэрэ. Оттон бу күннэргэ Орто Халымаҕа уонна Анаабырга массыыналар айанныахтара.
Никита Павлов, СӨ гражданскай көмүскэл уонна олоххо-дьаһахха куттал суох буолуутун хааччыйар миниистирин солбуйааччы: "Арктикатааҕы эргиэн логистика киинин быйылгы былаана 3368 тыһ. туонна. Бүгүҥҥү күҥҥэ 1204 тыһ. туоннаны тиэнэн тураллар".
Хоту уонна ыраах сытар нэһилиэктэргэ таһаҕастары тиэрдии тустаах хонтуруолга турар. Хаалбыт кэми баттаһа былаан туолуута 100% тэҥнэһиэхтээх. Күн бүгүн 418 тыһыынча туонна тиэллиннэ. Былаан 82% туолан турар. Былырыыҥҥы сылы кытта тэҥнээтэххэ, былаантан хаалыы баар. Маныаха тустаах салалталар кыһалҕалары туоратан, түргэн быһаарыыны ылыналлар.
Никита Павлов, СӨ гражданскай көмүскэл уонна олоххо-дьаһахха куттал суох буолуутун хааччыйар миниистирин солбуйааччы: “Дьабарыкы хайатыгар таас чох хостооһуна бытааран кыһалҕаны көрүстүбүт. Онон Томпо, Дьааҥы улуустарыгар ыраахтан тиэйиллэр чох кэлбитэ. Сорох чааһын уунан тириэрдиигэ көһөрдүлэр”.
Быйыл Саха сиригэр ириэрии эрдэлээтэ. Онон кыһыҥҥы суоллар сабылар болдьохторо былаантан эмиэ уларыйдылар. Күнү-дьылы кэтээн көрөр сулууспа иһитиннэрэринэн манна түргэн сылыйыы оруолу оонньоото. Маныаха бу нэдиэлэҕэ халлаан эмискэ тымныйыаҕа, салгын температурата -10-15 кыраадыска диэри тымныйара күүтүллэр.
Саргылаана Петрова, Дьокуускайдааҕы гидрометеорологическай сулууспа күнү-дьылы кэтээн көрөр салаатын салайааччы: “Арҕаа сис былыт хоту диэкки сыҕарыйан киин, соҕуруу улуустарга сөҥүүлээх, тыаллаах тымныы күн-дьыл туруо ”.
Өрүһүнэн сылдьар кыһыҥҥы суолларга уйугу намтатыы саҕаламмыта. Эрдэ, өрүс суолларын сабыыта муус устар 15 күнүгэр диэн бэлиэтэммитэ. Бүлүү уонна Халыма хайысханан муус устар 8 күнүттэн 20 туоннаҕа диэри түһүөҕэ. Оттон бэҕэһээҥҥиттэн Кэбээйи улууһугар "Кальвица-Сангар" хайысханан айан-сырыы тохтотулунна.