Халаан бэлэмигэр эбии үп көрүлүннэ
Сааскы халааҥҥа бэлэм буолууну тургутуу. Дьокуускайга Москваттан ыксаллаах быһыы-майгы министиэристибэтин киин хамыыһыйата кэлэн халааны туоратыыга итиэннэ ойуур баһаардарын умулларыыга тустаах сулууспалар бэлэмнэрин сыаналыы кэллэ. Маныаха хамыыһыйа Нам уонна Хаҥалас улуустарыгар үлэлээн, миэстэтигэр үлэ хайдах барарын бэрэбиэркэлээтэ.
Александр Никифоров, ЫБММ СӨ салалтатын салайааччытын солбуйааччы: "Дьокуускайдааҕы метеосулууспаттан иһитиннэрии ылан турабыт. Ол онно этиллэринэн Өлүөнэ өрүскэ харыылар тахсыахтарын сөп диэн. Ол күн-дьыл туругуттан тутулуктаах буолуоҕа. Халаан кэмигэр ыксаллаах-быһыы майгы түгэнэ үөскээтэҕинэ өрөспүүбүлүкэ бэлэм диэн сыанабыл ыллыбыт".
Үс Хатыҥ сиригэр ыытыллыбыт көрүүгэ ханнык-туох тиэхиньикэ ыксаллаах балаһыанньаҕа туттулларын, экипировка, тус састаап хааччыллыытын сиһилии билистилэр. Сааскы халааны этэҥҥэ туоратыы эрдэттэн бэлэм буолууну эрэйэр. Быйыл, ааспыт сылы кытта тэҥнээтэххэ, муус чараас эрээри, сорох сиргэ нуорманы таһынан халыҥ диэн барыллаан ааҕаллар.
Пётр Аргунов, Өлүөнэтээҕи уу салалтатын салайааччы: "Кыһыммыт арыый сылаас уонна хаар чараас. Онон сорох сирдэргэ муус нуорматтан халыҥ. Ол курдук Дьокуускай аннынан, Нам диэкки халыҥ уонна Халыма өрүскэ Зырянкаҕа халыҥ".
Оттон хаар саппааһа хоту өрүстэргэ итиэннэ Өлүөхүмэ улууһугар нуорматтан 150-200 бырыһыанынан элбэх. Онон сааскы халааҥҥа бэлэмнэнии элбэх үлэни эрэйэр. Билигин соҕуруу, киин улуустарга кыһалаҕалаах учаастактарга мууһу хараардыы, эрбээһин ыытылла турар. Сааскы халааны сэрэтиигэ Саха сирин өрүстэригэр, чуолаан мууһу хараардыы, кэбирэтии үлэлэригэр, быйыл 70-тан тахса мөлүйүөн үп көрүлүннэ. Маныаха кэнники кэмҥэ туруорсуу түмүгэр, бу сылга кыһалҕалаах сирдэри эбии киллэрдилэр.
"Кулун тутар ый бүтэ илик эрээри хаар ууллан чалбах, бадараан таҕыста. Бу ый бүтүүтэ Саха сирин олохтоохторугар бэрт сылаас күнү-дьылы бэлэхтээтэ. Билигин нуорманы хас да кыраадыһынан куоһарар. Бэл, хоту улуустарга нуорманы куоһарар", - Татьяна Николаева, корреспондент.
Ол курдук хотугулуу-илин, киин, соҕуруу улуустарга салгын температурата бүтүн 12 кыраадыһынан сылаас. Аномальнай сылыйыыны тэҥэ, сөҥүү түһүүтэ эмиэ нуорманы таһынан. Күн-дьыл сылыйыыта муус ириитин түргэтитэр. Сыллата буоларын курдук халаан балаһыанньата уустук буолуон сөп.