Дойдуга бэриниилээх буолууну иҥэрэр соруктаах үлэлии-хамныы сылдьар

Айылҕа күүһэ хайдах курдук сэрии толоонугар көмөлөспүтүн Россия Дьоруойа Родимир Максимов ыччаттарга кэпсиир. Тиэхиньикэнэн кимэн киирии кэмигэр, өстөөх дрона көрбөтүн диэн  көрдөспүттэрин курдук туман  түспүтүн, оҕолорго тиийимтиэ гына тириэрдэр. Уонна ийэ айылҕаҕа харыстабыллаахтык сыһыаннаһалларын тоһоҕолоон этэр.

Родимир Максимов, Россия Дьоруойа: "Көнөтүнэн эттэххэ, сахалар, сэриигэ эрэ буолбатах, ханна баҕар тиийдэхпитинэ айылҕаҕа итэҕэлбит күүс-көмө буолар". 

Родимир бэйэтэ этэринии, кини айылҕа оҕото. Оттон бүгүҥҥү тэрээһиҥҥэ, бу кырачааннарга тулалыыр эйгэни харыстааччы былаатын Россия Дьоруойа баайбыта  хас да бүк суолталаах. Кини билигин ыччакка дойдуга бэриниилээх буолууну иҥэрэр соруктаах үлэлии-хамныы сылдьар.

Родимир Максимов, Россия Дьоруойа: "Илиҥҥи байыаннай уокурукка сулууспалыы сылдьабын. “Мы есть мы” диэн айар бөлөххө ыллыыбын. Тыылы уонна фрону холбуохпутун наада диэн соруктаах үлэлиибит. Антах туох буола турарын манна кэлэн көрдөрөбүт. Россия куораттарынан сылдьабыт".  

Бу киинэ каадырдара буолбатах, саха байыаһын  хорсун быһыытын уһуллуута. "Бурхат" диэн бойобуой ааттаах Родимир Макимов бааһыран баран, соҕотохтуу 2 күн устата өстөөх түөртэ кимэн киирэ сатаабытын тэйиппит уонна 27 өстөөҕү туораппыт түгэннэриттэн көстөр.  Бу хорсун быһыытын иһин кини Арассыыйа Дьоруойа үрдүк ааты ылбыта. Олох иһин, дойду иһин киирсибит байыас билигин ыччат туһугар сулууспалыыр.

Родимир Максимов, Россия Дьоруойа: "Инники кэскиллэрбитин, дойдуну көмүскээччилэрбитин, уопсайынан норуоппут инники сирэйин, хайдах бэйэбит үөрэтэбит да оннук үөскүүр. Бары геройдар дии саныыбын, мээнэ киһи ылла да барбатдойдуну көмүскүү, дойдуну көмүскээһин дьиэ кэргэнтэн саҕаланар дии саныыбын".  

Хорсун быһыы, эр санаа, тулуур туоһута, холобур буолар саха сэмэй байыаһа Россия Дьоруойун үрдүк аатын дьоһуннаахтык сүгэр.