Горнай улууһугар быйыл Доруобуйа сыла
Олохтоох хирургтар ситиһиилэрэ. Уустук тостууга кэмигэр сөптөөх эпэрээссийэ оҥороннор, ыарыһах кылгас кэм иһигэр этэҥҥэ оспут. Билигин уҥуоҕу тутар аппараатын уһуллулар, инниктин чөлүгэр түһэрии күүтэр.
Иван Оконешников, эмтэнээччи: "Ааспыт күһүн илиибин тоһуппутум. Кэбээйигэ балыыһабыт өрүс уҥуор, ол иһин манна кэлбитим. Тута эпэрээссийэлээбиттэрэ".
Горнай улууһугар хирургия салаата Саха сиригэр биир тарбахха баттанар сайдыылаах. Ааспыт сыл манна тобук уҥуоҕар эндпротезирование кытта оҥоһуллан саҕалаабыта. Оттон быйыл саҥа лапароскоп кэлэрин кэтэһэллэр. Бу уустук эпэрээссийэлэри оҥорууга улахан көмө буолуоҕа.
Иван Федотов, Горнай киин балыыһатын хирургия салаатын сэбиэдиссэйэ: "Уустук эпэрээссийэлэр кэнники кэмҥэ оҥоһуллар буоллулар. Үөс быһааһынын мини инвазивнай оҥоро сатыыбыт. Оттон билигин лапароскопическай стойка кэллэҕинэ өссө судургу буолуо үлэлииргэ".
Маны тэҥэ лаборатория чинчийэр кыаҕа эмиэ кэҥиир. Кэнники кэмҥэ улуус таһымыгар дэҥҥэ оҥоһуллар анализтары дэбигистик оҥорор буоллулар. Доруобуйа сылын чэрчитинэн лаборатория салаата бу сайын саҥалыы өрөмүөннэниэ.
Любовь Захарова, Горнай киин балыыһатын фельдшер-лабараана: "Сүрэх быччыҥнарын кэһиллиитин быһаарар тэрил. Инфаркт, инсульт курдук ыырыыларга олус туһалаах, түргэнник диагноз туруорарга олус көмөлөөх".
Нэһилиэнньэ ахсаанын элбэтии, олохтоохтор доруобуйаларын сыныйан туран көрүү, чөл олоҕу өрө тутуу - бу Горнай улууһугар Доруобуйа сылын соруктарыттан сорҕото. Улууска доруобуйа харыстабылын 95 сылын көрсө быйыл Доруобуйа сыла биллэриллибит.
Татьяна Юмшанова, Горнай киин балыыһатын кылаабынай бырааһы эмтиир үлэҕэ солбуйааччы: "Кыра оҕоттон саҕалаан аҕам саастаахтары барыларын хабан, хас биирдии киһиэхэ болҕомто ууран доруобуйаларын тупсарарга араас хабааннаах тэрээһиннэр буолуохтаахтар. Дьокуускай куораттан исписэлиистэр кэлэннэр нэһилиэнньэни көрүөхтээхтэр".
Ону кытта өрөспүүбүлүкэтээҕи Нэһилиэнньэ доруобуйатын киинин кытта хас да бырайыак сыл устата олоххо киириэ. Маны барытын Горнай киин балыыһата сүрүннүүр. Өрөспүүбүлүкэҕэ биир бөдөҥ доруобуйа харыстабылын тэрилтэтэ сыллата үлэтэ сайдар, эмтиир кыаҕа кэҥиир.
"Горнай киин балыыһата улуус нэһилиэнньэтин крөрөрү таһынан чугастыы сытар Бүлүү, Кэбээйи оройуонун дьонун-сэргэтин кытта көрөр. Ааспыт сылга уопсайа барыта 60 тыһыынчаттан тахса киһи манна көрдөрүммүт" , - Мария Дмитриева, корреспондент.
Доруобуйа сылын устата улууска медицинэ өҥөтүн тупсарыыга туһуланар үлэ күүһүрүө. Ыытыллар үлэ "Уһун уонна көхтөөх олох" диэн национальнай бырайыак соруктарынан барар.