Саха түмэлигэр сибэкки быыстапката турда

Саха түмэлигэр сайын. Айар-тутар талааннаах маастар, худуоһуонньук Мария Попова Саха сирин кэрэ сибэккилэрин үтүгүннэрэн полимернай туойунан оҥорор. Барыта илии үлэтэ. Хас биирдии оҥоһугун ымпыгар-чымпыгар диэри чочуйан оҥорор.

Мария Попова, худуоһунньук: "Сибэккилэр түһүмэхтээн оҥоһуллаллар. Холобур, бастаан элбэх да элбэх эминньэҕи, тычинкалары оҥортуубун. Ол кэннэ кырааскалыыбын. Дьэ онтон хомуйабын".

Маны таһынан  худуоһунньук айылҕа кэрэ көстүүтүн дьүһүйэн,  үөннэри-көйүүрдэри, отону, дьэдьэни оҥорон дьоннору сөхтөрөр. 

Мария Попова, худуоһунньук: "Бу оҥоһукпун тыыннааҕымсытаарыбын сарсыардааҥҥы сииги оҥорбутум уонна кыра түүлээн биэрбитим".

Кырдьык да, хас биирди оҥорбут үлэтэ, дьиҥнээх сибэккиттэн туох да уратыта суохтук көстөр. Ол эрэн, бу үлэ чэпчэкитэ суох, элбэх бириэмэ баранарын худуоһунньук кэпсиир.

Мария Попова, худуоһунньук: "Кучу оту оҥоруу ордук элбэх бириэмэни ылбыта. Тоҕо диэтэр ото хойуу, сибэккитэ бытаххай элбэх. Тыыннаах сибэккини тутан олорон оҥорор ордук, хайдах оҥоһуулааҕын көрөргө".

Мария Попова айбыта-туппута 10 сылыгар барда. Кини Максим Аммосов аатынан Хотугулуу-Илиҥҥи федеральнай университекка үлэлиир. Устудьуоннарга, баҕалаах дьоҥҥо куруук маастар-кылаас ыытар, сүбэ-ама биэрэр. Инникитин Саха сирин кэрэ сибэккилэрин барытын оҥорор былааннаах.

Мария Попова, худуоһунньук: "Бу үлэм иккис чааһын эһиил оҥорор былааннаахпын. Онно баҕа батаһын суолкай оҥоруом итиэннэ Аммаҕа үүнэр саха сакуратын холонуом".

Худуоһунньук бу бастакы анал быыстапката буолар. Быыстапка Емельян Ярославскай аатынан Саха түмэлигэр биир ый устата көрдөрүүгэ туруоҕа.