Ойуур баһаарыгар бэлэм күүскэ барар
Парашютист-баһаарынайдар биирдии-биирдии АН-2 көтөр аалтан тэбинэн халааҥҥа дайаллар. Биир тыһыынча миэтирэ үрдүктэн ыстаналлар. Сыллата ыытыллар "Авиалесоохрана" сааскы үөрэтиилэрэ Нөмүгүгэ саҕаланналлар. Хамаанда аҕыйах мүнүүтэ иһигэр халлаанынан түһэн иһэн, түргэнник толкуйдуу охсон, чопчу ыйыллыбыт миэстэҕэ парашютун арыйан түһүөхтээх.
Сотору кэминэн, омуннаабакка эттэххэ, 1,5 ыйынан ойуур баһаардарын кэмэ саҕаланыа. Ол иһин билигин бу үөрэтиилэргэ чочуйуллубут үөрүйэхтэр эҥкилэ суох, ол кэм саҕана олус туһалаах буолуохтара. Сорох уот турбут сирдэригэр халлаанынан эрэ тиийиллэр. Бу туһунан 3 сылын бу эйгэҕэ үлэлии сылдьар Владимир Миронов кэпсиир. Кини үөрэтиигэ саамай тутаах парашюту хомуйуу буоларын чопчулуур.
Владимир Миронов, "Авиалесоохрана" Уус Майатааҕы салаатын баһаарынай-парашютиһа: "Бу билигин парашютпун хомуйа сылдьабын. Онтон рюкзагар угуом. Үөрэтии этэҥҥэ бара турар".
Бүгүҥҥү үөрэх киэҥ далааһыннаахтык ааста. Уопсайа Нөмүгү ытык сиригэр 48 парашютист-баһаарынай кыттыыны ылла. Быраагыраама чэрчитинэн хас биирдии үлэһит 12-тэ парашютунан ыстаныахтаах. Халлаан туран биэрэн, көтөр аал да, баһаарынайдар да ыстаналларыгар тыала суох, чуумпу күн-дьыл туран биэрдэ. Уоппуска кэнниттэн ыстанарга долгуйуу баар диэн байыастар санааларын үллэстэллэр.
Иван Илларионов, парашютист -баһаарынай: "Уоппуска кэннэ син биир кыра салыы баар буолар. Бастакы ыстаныы кэннэ үчүчгэй буолар".
Сыллата маннык үөрэхтэр ыытылланнар Саха сиригэр дьиҥ идэлээх ойуур баһаардарын утары үлэлээччилэр этэрээттэрэ хаҥыыр. Быйыл Эдьигээн уонна Орто Халыма улуустарыгар саҥа "Авиалесоохрана" салаалара арыллыннылар. Онон саҥа курсааннары үөрэтии инникки күөҥҥэ.
Евгений Павлов, инструктор: "Бу балар кэннэ өссө курсаннар баар буолуохтара. Кинилэри өссө өр үөрэтиэхпит. Үрдүктэн ыстаныы, бөлөҕүнэн ыстаныы уонна чопчу ыйыллыбыт туһаайыыга түһүүнү эрчийиэхпит. Уолтаттар сайын баһаар кэмигэр бэлэмнээх буолларын курдук".
Онтон "Авиалесоохрана" парашютист-баһаарынайдара маннык киэҥ далааһыннаах үөрэхтэрэ муус устар ыйга диэри ыытыллыаҕа, онтон салгыы дьиҥнээх үлэ саҕаланыа.