Истэллэрэ кэһиилээх дьон ортотугар буулдьанан ытыыга өрөспүүбүлүкэ чемпионата ыытыллар

Үөһээ Бүлүү улууһуттан кэлбит Иван Яковлев буулдьанан ытыынан үлүһүйбүтэ 10-тан тахса сыл буолла. Биирдэ холонон баран салгыы үлүһүйэн билигин өрөспүүбүлүкэ 10 иһигэр киирсэр ытааччыта. Былырыын бу күрэхтэһиигэ 3 миэстэни ситиспитэ, быйыл көрдөрүүм арыый мөлтөх диэн кэпсиир. 

Иван Яковлев, күрэхтэһии кыттыылааҕа: «Ытыыга көрдөрүүм арыый мөлтөх быһылаах. Бэстэлиэккэ кыттыам диэн толкуйдана сылдьабын. Сааҕа киһибит суох, ол иһин киирдим».

Буулдьанан ытыы күрэхтэһиитигэр 11 улуустан уопсайа 48 кыттааччы кэлэн бастыыр иһин кыттар. Бэстилиэтинэн уонна винтовканан ыталлар. Сыллата хамсаналларыгар хааччахтаах уонна истэллэрэ мөлтөх инбэлиит дьон бу Чемпионакка кэлэн күрэхтэһэр. Кинилэр ортолоругар ааттаах-суоллаах спортсменнары тэҥэ, саҥа саҕалааччылар эмиэ бааллар.

Күрэхтэһиигэ коррекционнай оскуола үөрэнээччилэрэ эмиэ кытталлар, ол эрээри оҕолор ахсааннара аҕыйах, сүрүннээн улахан дьон. Эр дьон, дьахтар диэн арахсаллар. Кыттаччылар эрдэттэн бэлэмнэнэн бастыҥ көрдөрүүнү ситиһэргэ дьулуһаллар.

Александр Сотников, күрэхтэһии кылаабынай судьуйата, СӨ сүүмэрдэммит хамаандатын тренерэ: «Ситиһии баар, дьарыктана сатыыллар. Улуустарга күүскэ ылсан үлэлииллэрэ буоллар үчүгэй буолуо этэ. Үлэлии сатыыллар, ол гынан баран куоракка курдук усулуобуйалара суох буоллааҕа ».

Ытыыга кыраҕы хараҕы тэҥэ кытаанах ньиэрбэ, долгуйбат буолуу, холку сыһыан, тулуур ирдэнэр. Мария Соломонова ытыынан кэргэнин батыһан үлүһүйбүт, ону тэҥэ армрестлиҥҥа спорт маастара, атын көрүҥнэринэн эмиэ ситиһиилээхтик дьарыктанар. 

Мария Соломонова, күрэхтэһии кыттыылааҕа: «Дьиэҕэ олорон хаалбакка, маннык сэргэхтик сылдьаары кэлэбит. Табаарыстарбытын көрсөбүт, куруутун бииргэ алтыһан сылдьабыт».

Кэнники кэмҥэ буулдьанан ытыы көрүҥэ сайдан иһэр. Ону аан дойду таһымыгар чаҕылхай ситиһиилэр туоһулууллар. Евдокия Каторгина, Мария Егорова курдук ытааччылар Арассыыйаҕа лидердэр буолаллар. Ону тэҥэ сыл ахсын дойду күрэхтэһиитигэр мэтээллэр эмиэ кэлэ тураллар.