Күн-дьыл туруга суолга күмүмэҕэйдэри үөскэтэр

Иннигэр 10 миэтэрэ арыттаах айаннаан иһэр массыына көстүбэт. Өрөспүүбүлүкэ суолларыгар балыаһыанньа кытаанах. Бу күннэргэ Саха сиригэр хойуу хаар эмискэ үллүктээн, тимир көлө айанныырыгар үгүс күчүмэҕэйдэри үөскэттэ. Улууһу ситимниир аартыктарга суолтан көтүү түбэлтэлэрэ таҕыстылар.

Майя Местникова, СӨ суолга куттал суох буолуутун хааччыйар иниспиэксийэ сүрүннүүр иниспиэктэрэ: "Өрөбүл күннэргэ өрспүүбүлүкэҕэ 33 суол быһылаана таҕыста. Манна икки киһи эчэйбит. Аммалыыр суолга тахсыбыт саахалга 1982 сыллаах төрүөх дьахтар уҥуох тостуулаах эт-хаан эчэйиитин ылбыт".

Билигин федеральнай "Лена" аартыкка балаһыанньа уустук. Кытай диэкиттэн кэлбит салгын күүстээх силлиэлээх хаары түһэрдэ. Онон ити хайысхаҕа Алдан, Нерюнгри диэки, Амуур уобалаһын суолугар айанныыртан туттунарга ыҥыраллар. Улахан аартыктарга дьуһуурустубалар олохтоноллор.

“ГАИ иниспиэктэрдэрэ күн-дьыл уларыйар кэмигэр күүһүрдүллүбүт эрэһиимҥэ үлэлииллэр. Ол курдук федеральнай суол аартыктарыгар массыыналары тохтотон бэрэбиэркэлииллэр”, - Анастасия Добрянцева, корреспондент.

Ахсыс сылын суолга куттал суох буолуутун хааччыйар иниспиэксийэҕэ иниспиэктэринэн үлэлиир Дьулустаан Иванов билигин күүһүрдүллүбүт эрэһииминэн үлэлии сылдьалларын иһитиннэрэр. Күн-дьыл уларыйар кэмигэр суол быраабылатын тутуһан айанныыры сүбэлиир.

Дьулустаан Иванов, Дьокуускайдааҕы суолга куттал суох буолуутун хааччыйар иниспиэксийэ иниспиэктэрэ, полиция лейтенана: "Билигин мантан саас суол халтараан буолуоҕа. Онон көлө түргэнин, икки ардынааҕы арытыты сөптөөхтүк тутуһан айанныылларын ыҥырабын. Ону сэргэ харыстанар курдары булгуччу баана сылдьыҥ. Ыраах айанныыр суоппардар сылайдылар эрэ, тохтоон  сынньаналлара наадалаах".

Киин куоракка эмиэ эмискэ хаар түһэн Дьокуускай хойуу сырыылаах, үгүс массыына айанныыр уулуссаларыгар харыылар тахсаллар. Суолунан айан күчүмэҕэйдэнэр.

Жанна Макарова, Дьокуускайдааҕы суолга куттал суох буолуутун хааччыйар сулууспа сырдатар үлэҕэ иниспиэктэрэ: "Ааспыт өрөбүллэргэ Дьокуускайга 18 суол саахала таҕыста. Ол иһигэр биир оҕо оптуобуһунан айаннаан, иһэн охтон эчэйии ылбыт. Санатан этэбин, бу 27 диэри күүһүрдүллүбүт эрэһиимҥэ үлэлиибит. Суоппардары сэргэ сатыы сылдьааччыларга эмиэ улахан болҕомто ууруллуо".

Манна чопчулаатахха, сатыы сылдьааччыларга болҕомто ууруллан, суол быһа охсуһууларыгар, сатыы туорааһын сирдэргэ биэрэбиэркэлэр ыытыллыахтара.